ކުރީގެ ރައީސުންނަށް ދެމުން އައި އޮފީސް އެލަވަންސް ކަނޑާލައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ކުރީގެ ރައީސުންގެ ރައްކާތެރިކަމާއި އިނާޔަތްތަކާ ބެހޭ ޤާނޫނަށް ގެންނަ ތިންވަނަ އިސްލާޙުގެ ބިލު ތަސްދީޤުކުރައްވައި، އެ ބިލު ދިވެހި ސަރުކާރުގެ ގެޒެޓުގައި ޝާއިޢުކުރައްވައިފިއެވެ. މި އިސްލާޙުގައި ހިމެނޭ މުހިންމު ބަދަލުގެ ގޮތުގައި، ކުރީގެ ރައީސުންނަށް ކުރިން ދެމުން އައި އޮފީސް އެލަވަންސް ވަނީ ކަނޑާލައިފައެވެ. މިއީ ދައުލަތުގެ ވަސީލަތްތައް ހަރުދަނާކޮށް ބޭނުންކުރުމަށްޓަކައި ޚަރަދު ކުޑަކުރުމުގެ ސަރުކާރުގެ މަސައްކަތްތަކުގެ ތެރެއިން ހުށަހެޅި ފިޔަވަޅެއް ކަމަށް ރައީސް އޮފީހުން ބުނެފައިވެއެވެ.

މި އިސްލާޙުގައި ވަނީ، ކުރީގެ ރައީސަކު ދެވަނަ ދައުރަކަށް އިންތިޚާބުވެއްޖެ ނަމަ ނުވަތަ ދައުލަތުގެ އެހެން މަޤާމަކަށް ވަޑައިގެންފި ނަމަ، އެ މުއްދަތުގައި މާލީ އިނާޔަތްތައް ހުއްޓާލެވޭނެ ކަމަށް ބަޔާންކޮށްފައެވެ. އަދި ރާއްޖެއިން ބޭރުގައި ދިރިއުޅުއްވާ ކުރީގެ ރައީސަކަށް، އެ މުއްދަތުގައި ދައުލަތުން ދޭ ސެކިއުރިޓީ ލިބިވަޑައެއް ނުގަންނަވާނެ ކަމަށް ވެސް މި އިސްލާޙުގައި ބުނެފައިވެއެވެ.

މީގެ އިތުރުން، ފުރިހަމަ ފަސް އަހަރުގެ ރިޔާސީ ދައުރެއް ފުރިހަމަކުރައްވާފައިވާ ކުރީގެ ނައިބު ރައީސުންނަށް ވެސް ރައްކާތެރިކަމާއި އިނާޔަތްތައް ދިނުމަށް މި އިސްލާޙުގައި ވަނީ ހިމަނާފައެވެ. އެގޮތުން މަހަކު 30،000 ރުފިޔާގެ އެލަވަންސްއާއި، ރާއްޖެއާއި ރާއްޖެއިން ބޭރުން ދައުލަތުގެ ޚަރަދުގައި ސިއްޙީ ޚިދުމަތްތައް ލިބޭނެއެވެ. ކުރީގެ ރައީސެއް ނުވަތަ ނައިބު ރައީސެއް، މަޤާމުގައި ހުންނަވައިގެން ކުރެއްވި ކުށެއް ސާބިތުވެގެން ކޯޓަކުން ހުކުމްކޮށްފި ނަމަ، ހުރިހާ ރައްކާތެރިކަމާއި އިނާޔަތްތައް ހުއްޓައިލެވޭނެ ކަމަށް މި އިސްލާޙުގައި ބަޔާންކޮށްފައިވެއެވެ. މި ބިލު ރައްޔިތުންގެ މަޖިލީހުގެ މި އަހަރުގެ ތިންވަނަ ދައުރުގެ 27 ވަނަ ޖަލްސާގައި ފާސްކުރި ބިލެއް ކަމަށްވާއިރު، އެއަށް ޢަމަލުކުރަން ވަނީ ފަށައިފައެވެ.