މިދިޔަ ނޮވެމްބަރު 30 ވަނަ ދުވަހު ހުޅުމާލޭ ގެސްޓްހައުސްއެއްގައި މަރުވި ނޭޕާލްމީހާގެ ބަނޑުން 78 ބްލެޓް މަސްތުވާތަކެތި ނަގައިފައިވާ ކަމަށް ފުލުހުން ހާމަކޮށްފިއެވެ. މީޑިއާތަކަށް ފުލުހުން ހިއްސާކުރި މައުލޫމާތުގައިވަނީ މަރުވި މީހާގެ ހަށިގަނޑުން އަނިޔާގެ އެއްވެސް ނިޝާނެއް ނުފެނުނު ނަމަވެސް ސީޓީ ސްކޭންކުރުމުން އޭނާގެ ގޮހޮރުގައި މަސްތުވާތަކެތި ހުރިކަން ފާހަގަވި ކަމަށެވެ.
ޕްރޮސެކިއުޓަރ ޖެނެރަލްގެ ލަފާގެ މަތިން ޑޮކްޓަރެއްގެ ލަފާގައި މިމަހުގެ ދެވަނަ ދުވަހު މަރުވި މީހާގެ ގަބުރު ކޮނެފައިވަނީ ބަނޑުން މަސްތުވާތަކެތި ނެގުމަށްޓަކައެވެ. އެ އޮޕަރޭޝަން ސިއްހީ ޚިދުމަތްދޭ ތަނެއްގައި ކޮށްފައި ނުވަނީ އެފަދަ އޮޕަރޭޝަނެއް ކުރަން އެނަލައިޒްކުރަން އެނގޭވަރަށް ހަށިގަނޑު ކުނިވެފައިވާތީ ކަމަށް ފުލުހުން ބުނެއެވެ. ނަގާފައިވާ 78 ބްލެޓްގެ ބަރުދަން 818 ގްރާމް ކަމަށް ފާހަގަކޮށްފައިވެއެވެ.
ފުލުހުން މައުލޫމާތުދެމުން ބުނީ މަރުވި މީހާ އިތުރު ދެމީހަކާއެކު ނޮވެމްބަރު 26 ވަނަ ދުވަހު މާލެ އަރާފައިވާ ކަމަށެވެ. އެ ތިން ފަހަރު ކ. މާފުށީގައި އުޅުމަށްފަހު ނޮވެމްބަރު 28 ވަނަ ދުވަހު މާލެ އައިސް، މަރުވި މީހާ ނޫން އަނެއް ދެމީހުން އެދުވަހު ރާއްޖެ ދޫކޮށް ފިލާފައިވާ ކަމަށް ބެލިބެލުމުން އެނގިފައިވާ ކަމަށް ފުލުހުން ހާމަކުރިއެވެ. މައްސަލަ ތަހުގީގު ކުރަމުންދާ ކަމަށާއި، މައްސަލައިގެ ބާވަތުން އިތުރު ފަރާތްތައް ދެނެގަތުމަށް މަސައްކަތް ކުރަމުންދާ ކަމަށް ފުލުހުން ބުންޏެވެ.
ކޮމެންޓު ފޮނުވާ