މަސްތުވާތަކެތި ރާއްޖެއަށް އެތެރެކުރާ މީހުންނަށް މަރުގެ އަދަބު ދޭ ގޮތަށް ގާނޫނު ބަދަލުކުރުމުން ޑްރަގު އެތެރެކުރުން ހުއްޓޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
މާފަންނު ރައްޔިތުންނާ ބައްދަލުކުރެއްވުމަށް ތާޖުއްދީން ސްކޫލްގައި ރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ޑްރަގު މައްސަލައިގެ އަސްލަކީ އެތެރެކުރުން ކަމަށާއި، އެކަން ހުއްޓުވައިގެން ނޫނީ މައްސަލަ ހައްލު ނުވާނެ ކަމަށެވެ. މިދިޔަ ބުދަ ދުވަހު މަޖިލީހުގެ 65 މެންބަރުންގެ ވޯޓާ އެކު ފާސްކުރި ބިލުގައި ޑްރަގު އެތެރެކުރާ މީހުންނަށް މަރުގެ އަދަބު ދެވޭ ގޮތަށް ވަނީ ހިމަނާފަ އެވެ.
ރައީސް ވިދާޅުވި ގޮތުގައި މިފަދަ ހަރުކަށި އަދަބުތައް ކަނޑައެޅެނީ އެ އަދަބު ދޭ ހިތަކުން ނޫނެވެ. ނަމަވެސް މިފަދަ ބޮޑެތި އަދަބުތައް ހުރުމުން އެކަން ކުރާ މީހުން މަދުވެ، ޑްރަގު އެތެރެކުރުން ހުއްޓޭނެ ކަމަށް އެ މަނިކުފާނު ވިދާޅުވި އެވެ. އަދި ދީނުގައި ވެސް އަދަބުތައް ކަނޑައެޅިފައި ހުންނަނީ ކުށްތައް ހުއްޓުވުމުގެ ބޭނުމުގައި ކަން ރައީސް ފާހަގަކުރެއްވި އެވެ.
މީގެ އިތުރުން، ޑްރަގު މައްސަލަތަކުގައި ކޯޓުތަކުން ވެސް މިހާރު ފުރިހަމަ އެއްބާރުލުން ލިބެމުންދާ ކަމަށާއި، ވަކި މީހަކަށް ބެލުމެއް ނެތި ފަނޑިޔާރުން ހުކުމް ކުރައްވަމުން ގެންދަވާ ކަމަށް ވެސް ރައީސް ވިދާޅުވި އެވެ.
ކޮމެންޓު ފޮނުވާ