މިއީ ވަކި މީހަކަށް ވަކި ގޮތަކަށް ހުކުމެއް ކުރަން ޝަރުޢީ ދާއިރާއަށް ނުފޫޒު ފޯރުވާ ސަރުކާރެއް ނޫން ކަމުގައި ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މާފަންނު ރައްޔިތުންނާ ބައްދަލުކުރައްވާ ތާޖުދީން ސްކޫލުގައި ބޭއްވި ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ ކޯޓުތަކަށް ދިމާވެފައިވާ ޖާގައިގެ ދަތިކަމަށް ޙައްލު ހޯއްދަވައި، ޝަރުޢީ ދާއިރާއަށް މާލީ ގޮތުން މިނިވަންކަން ކަށަވަރުކޮށްދެއްވާފައިވާ ކަމަށެވެ. މިކަންކަން ހަމަޖެހެން ފެށުމުން ބަންދުގައި ތިބި ފަރާތްތަކުގެ ޝަރީޢަތުގެ އަޑުއެހުންތައް ތާވަލުކުރެވޭ ގޮތުގެ މައުލޫމާތު މިހާރު އެ ފަރާތްތަކަށް ލިބެމުންދާކަމަށް އެމަނިކުފާނު ވިދާޅުވިއެވެ.
ވާނުވާ ބަންދުގައި މިވަގުތު 347 މީހުން ތިބިއިރު، އޭގެ ތެރޭގައި ކުޑަކުދިންނަށް ޖިންސީ ގޯނާކުރުމާއި، މަސްތުވާތަކެތި އެތެރެކުރުމާއި، ޓެރަރިޒަމާއި، މީހުން މެރުން ފަދަ ބޮޑެތި ކުށްތަކުގެ ތުހުމަތު ކުރެވޭ ފަރާތްތައް ހިމެނެއެވެ. މިފަދަ ކުށްކުށުގެ ތުހުމަތު ކުރެވޭ ބަޔަކު ރަނގަޅަށް ބެލުމެއް ނެތި މުޖުތަމައުގެ ތެރެއަށް ދޫކޮށްލުމަށް އެއްވެސް ރައްޔިތަކު ބޭނުންވާނެތޯ ރައީސް ސުވާލުކުރެއްވިއެވެ.
ރައީސް އިތުރަށް ވިދާޅުވީ މި ސަރުކާރަކީ ވަކި މީހަކަށް ވަކި ގޮތަކަށް ހުކުމެއް ކުރުމަށް ޝަރުޢީ ދާއިރާއަށް ނުފޫޒު ފޯރުވާ ސަރުކާރެއް ނޫން ކަމަށާއި، ކުރިއަށް އޮތް ތަނުގައިވެސް އެކަން އެގޮތުގައި ދެމެހެއްޓެވުމަށް މަސައްކަތް ކުރައްވާނެ ކަމަށެވެ.
ކޮމެންޓު ފޮނުވާ