ރައްޔިތުންނާއެކު ބާއްވާ ކޮންމެ ބައްދަލުވުމެއްގައިވެސް ހިއްސާކުރައްވާ މައްސަލަތައް ވަރަށް ގާތުން ބައްލަވަމުން ގެންދަވާ ކަމަށާއި އެކަންކަމަށް އެޅެން އޮތް ފިޔަވަޅެއް އަޅުއްވައިދެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މާފަންނު ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ކޮންމެ ރައްޔިތެއްގެ މައްސަލަ ހައްލުކުރުމަށް ސަރުކާރުން ވަރަށް ބޮޑު އިސްކަމެއް ދެއްވައިގެން މަސައްކަތް ކުރައްވާ ކަމަށެވެ. މާފަންނަކީ މާލޭގެ އެންމެ ބޮޑު އާބާދީއެއް އޮންނަ އެއް ސަރަހައްދު ކަމަށާއި އެތަނުގެ ރައްޔިތުންނަކީ އެންމެ ގިނަ މައްސަލަތައް ތަހައްމަލު ކުރަމުންދާ ބައެއް ކަމުގައި އެމަނިކުފާނު ފާހަގަކުރެއްވިއެވެ.
ރައީސް ވިދާޅުވީ ރައްޔިތުން ފޮނުވާ ސިޓީތަކަށް ވަރަށް ބޮޑަށް ސަމާލުކަން ދެއްވައި މައްސަލަތައް ހައްލުކޮށްދެއްވުމަށް މަސައްކަތް ކުރައްވަމުން ގެންދަވާ ކަމަށެވެ. މީގެ ތެރެއިން ބައެއް މައްސަލަތައް މިހާރުވެސް ހައްލުކޮށްދެއްވާފައިވާ ކަމަށާއި ކުރިއަށް އޮތް ތަނުގައިވެސް ހަމަ އެގޮތުގައި ކުރިއަށް ގެންދަވާނެ ކަމަށް ވިދާޅުވިއެވެ.
ރައީސުލްޖުމްހޫރިއްޔާގެ ވައުދުގެ ދަށުން އެމަނިކުފާނު ގެންދަވަނީ މާލޭގެ އެކި އަވަށްތަކުގެ ރައްޔިތުންނާ ބައްދަލުކުރައްވަމުންނެވެ. މީގެ ކުރިން ވިލިމާލެ އަދި މައްޗަންގޮޅީ ރައްޔިތުންނާ ވަނީ ބައްދަލުކުރައްވާފައެވެ.
ކޮމެންޓު ފޮނުވާ