ޖަޕާނަށް ރާއްޖެއިން ކަނޑައަޅާ ސަފީރު ކަމުގެ މަގާމަށް ކުރީގެ ޔޫތު މިނިސްޓަރު އަޙްމަދު މަހުލޫފް އައްޔަން ކުރެއްވުމަށް ރައްޔިތުންގެ މަޖިލީހުން މިއަދު ފާސްކޮށްފިއެވެ. މި ނިންމުން ފާސްވީ ވޯޓުގައި ބައިވެރިވެވަޑައިގެންނެވި 60 މެންބަރުންގެ އިއްތިފާގުންނެވެ.
މަހުލޫފް މި މަގާމަށް އައްޔަން ކުރެއްވުމަށް ރައީސް ޑރ. މުޙައްމަދު މުޢިއްޒު ފޮނުއްވީ މަހުލޫފް ވެރިކަން ކުރާ ޕީއެންސީއާ ގުޅިވަޑައިގެންތާ ހަފުތާއެއް ފަހުންނެވެ. ކުރިން އެމްޑީޕީގައި ހުންނެވި މަހުލޫފް ޕީއެންސީއާ ގުޅިވަޑައިގެންނެވީ މިދިޔަ ނޮވެމްބަރު 14 ގައެވެ.
ޕީއެންސީގެ ޕީޖީ ލީޑަރު އިބްރާހީމް ފަލާޙް ވިދާޅުވީ މަހުލޫފަކީ އެމްޑީޕީ ސަރުކާރުގެ އެންމެ ހިންގުންތެރި ވަޒީރު ކަމަށާއި، މި ސަރުކާރުން މީހުން އައްޔަން ކުރާއިރު ބަލާނީ ކުލައަކަށް ނޫން ކަމަށެވެ. ނަމަވެސް ވެލިދޫ ދާއިރާގެ މެންބަރު މުޙައްމަދު ޢައްބާސް ވަނީ މި ނިންމުމަށް ފާޑު ވިދާޅުވެ، ސަފީރުންގެ ގޮތުގައި ތިބެން ޖެހޭނީ ނަޒާހަތްތެރި ބޭފުޅުން ކަމަށް ވިދާޅުވެފައެވެ.
ކޮމެންޓު ފޮނުވާ