މިމަހުގެ 7 ވަނަދުވަ، އެމެރިކާގެ ރައީސް ޑޮނަލްޑް ޓްރަމަޕްގެ ސަޕޯޓަރުން، އެމެރިކާގެ ގާނޫނު ހަދާ މަޖިލިސް، ކެޕިޓަލް ހިލްއަށް ދިން ހަމަލާގައި، ސެނެޓްގެ ރައީސާ ނާންސީ ޕެލޯސީގެ އޮފީހަށް ވަދެ، އެކަމަނާގެ ގޮޑިކޮޅުގައި އިށީދެ އަދި މޭޒުކޮޅަށް ފައިލައިގެން، އިންނަ މަންޒަރު ފެންނަ، ސޯޝަލް މީޑިއާގައި ދައުރުވަމުންދާ ފޮޓޯއިން ފެންނަ މީހާ އެމެރިކާގައި ހައްޔަރު ކޮށްފިއެވެ.
މިމީހާގެ މައްޗަށް ވައްކަން ކުރުމާއި، އަދި ދައުލަތުގެ މުދަލަށް ގެއްލުން ދިނުމުގެ ދައުވާ އުފުލާފައިވާކަމަށްވެސް އެމެރިކާގެ ފެޑެރަލް އޮފިޝަލުން ވިދާޅުވެފައި ވެއެވެ.
ފެޑެރަލް އޮފިޝަލުން ވިދާޅުވެފައިވާ ގޮތުގައި، ރިޗަޑް ބާނެޓް ނަމަކަށް ކިޔާ މިމީހާ ހައްޔަރު ކޮށްފައިވަނީ، އާކަނަސްސް ސިޓީގައި ލިޓްލް ރޮކް ކިޔާ ސަރަހައްދަކުން ކަމުގައެވެ.
އޮފިޝަލުން ވިދާޅުވާގޮތުގައި، ރިޗަޑްގެ މައްޗަށް އުފުލިފައިވާ ދައުވާތަކުގެ ތެރޭގައި، ހުއްދަ ނޫން ސަރަހައްދަކަށް ވަނުމާއި، ކެޕިޓަލް ހިލްގައި ހަމަނުޖެހުން އުފެއްދުމާއި އަދި ދައުލަތުގެ މުދަލުން ވައްކަން ކުރުންވެސް ހިމެނިފައި ވެއެވެ.
އަދި މީގެ އިތުރުން ކެޕިޓަލް ބިލްޑިންގގެ ދެކުނު ފަރާތުގައި "ޕައިޕް ބޮމެއް" ބޭއްވި ކަމުގެ ތުހުމަތުގައި އެމެރިކާގެ ސިޓީއެއްކަމުގައިވާ އަލަބާމާއަށް ނިސްބަތްވާ ރައްޔިތަކު ހައްޔަރުކޮށްފައިވާ ކަމަށްވެސް ފެޑެރަލް އޮފޮޝަލުން ވަނީ ވިދާޅުވެފައެވެ. އޮފިޝަލުން ވިދާޅުވާ ގޮތުގައި އޭނާ ދުއްވި ޕިކަޕުން ވަނީ، އަލިފާން ހިފާ ޒާތުގެ ތެޔޮ އަޅާފައިވާ 11 ފުޅިއާއި އަދި ހަތިޔާރުގެ ގޮތުގައި ބޭނުންކުރެވިދާނެ ފަދަ ތަކެތިވެސް ފެނިފައެވެ.
"ޑިސީ (ކެޕިޓަލް ހިލް ހިމެނޭ ސަރަހައްދު) ދޫކޮށް ގޮސްފައިވީ ނަމަވެސް، އަދިވެސް އެދުވަހުގެ މުޒާހަރާގައި ބައިވެރިވި ކޮންމެ މީހަކުވެސް އުއްމީދު ކުރަަންވީ ހަމަ ކޮންމެ ވަގުތެއްގައިވެސް ގޭގެ ދޮރުގައި ޓަކިޖަހާ، ކެޕިޓަލް ހިލްގައި ހިންގާފައިވާ ހަމަނުޖެހުންތަކާ ގުޅިގެން އެމީހަކު ފުލުހުންގެ ބެލުމުގެ ދަށަށް ގެންދަން ޖެހިދާނެ ކަމަށް،" އެފްބީއައިގެ ވޮޝިންގަޓަން ފީލްޑް އޮފީހުގެ އެސިސަޓަންޓް ޑިރެކްޓަރ ސްޓީވް ޑަންޓޫ ވިދާޅުވިއެވެ.
"އެފްބީއައިއިން، މި ތަހުގީގައި ނުފޮރުޅާ އެންމެ ގާކޮޅެއްވެސް ނުބާއްވާނެ،" އޭނާ ވިދާޅުވިއެވެ.
އެމެރިކާގެ ޑިޕާޓްމަންޓް އޮފް ޖަސްޓިސްއިން ހުކުރުދުވަހު ހާމަ ކޮށްފައިވާ ގޮތުގައި، މިމަހުގެ 7 ވަނަ ދުވަހު ކެޕިޓަލް ހިލް ހިމެނޭ ސަރަހައްދުގައި ހިންގި ހަމަނުޖެހުންތަކާ ގުޅިގެން މިހާތަނަށް 13 މީހެއްގެ މައްޗަށް ވަނީ ދައުވާ އުފުލާފައެވެ. އެހެންނަމަވެސް، މީގެތެރެއިން މިހާތަނަށް ކޯޓަށް ހާޒިރު ކޮށްފައިވަނީ މަދު ބައެއްކަމަށް ވުމާއި ގުޅިގެން، މިއެންމެންގެ މައްޗަށް އުފުލާފައިވާ ދައުވާތަކުގެ ތަފްސީލުތަކެއް މީޑިއާތަކާ ހަމައަށް އައިސްފައެއް ނުވެއެވެ.
