ސްރީލަންކާއަށް ކުރިމަތިވި ތޫފާނުގެ ގެއްލުންތަކުން އަރައިގަތުމަށް އެހީވުމުގެ ގޮތުން ޕީއެސްއެމްއާއި ރާއްޖޭގެ 37 މީޑިއާއެއް ގުޅިގެން ކުރިއަށް ގެންދިޔަ "ސިލޯނާއެކު ދިވެހީން" ޓެލެތޯނުން 12 މިލިއަނަށްވުރެ ގިނަ ރުފިޔާގެ އެހީ ލިބިއްޖެއެވެ.
އާދިއްތަ ދުވަހުގެ ހެނދުނު 9:00 އިން ފެށިގެން ހޯމަ ދުވަހުގެ މެންދުރުފަހު 2:00 އާ ހަމައަށް ކުރިއަށް ގެންދިޔަ މި ޓެލެތޯނުން 11.5 މިލިއަން ދިވެހި ރުފިޔާއާއި 51،000 އެމެރިކާ ޑޮލަރު އަދި 20 ޔޫރޯ ލިބުނެވެ. މި ޓެލެތޯނަށް އެންމެ ބޮޑު އެހީއެއް ވެދިނީ ދިވެހި ފުލުހުންގެ މުއައްސަސާއިންނެވެ. އެގޮތުން ފުލުހުން 2.4 މިލިއަން ރުފިޔާ ހަދިޔާކުރިއިރު، އިންޓަރނޭޝަނަލް އެއިޑް ކެމްޕެއިން ފަދަ ޖަމާއަތްތަކުންވެސް މިލިއަނުން ފައިސާ ދީފައިވެއެވެ.
ކްރޯ މޯލްޑިވްސްގެ އޮޑިޓް ބައިވެރިވުމާއެކު ކުރިއަށް ގެންދިޔަ މި ޓެލެތޯނަށް ސަރުކާރުގެ އިދާރާތަކާއި ކުންފުނިތަކާއި ޖަމިއްޔާތަކުގެ އިތުރުން އާންމު ރައްޔިތުންގެ ފަރާތުން ބޮޑު ތަރުހީބެއް ލިބުނެވެ. ސްރީލަންކާ ސަރުކާރުން ވަނީ ދިވެހިންގެ މި ދީލަތި އެހީއަށް ޝުކުރު އަދާކޮށް، ލަންކާއަށް އެހީވާން އެންމެ ފުރަތަމަ އިސްނެގި ބަޔަކީ ދިވެހިންކަން ފާހަގަކޮށްފައެވެ.
ކޮމެންޓު ފޮނުވާ