މާލޭގެ އެތައް ތަނެއްގައި ހުޅުޖަހާ، ރަދުން ރަހީނުކޮށް، ދިވެހީންނަށް އަނިޔާދީ އަޅުވެތިކަމުގެ ނާމާން ދުވަސްތައް މި ގައުމަށް ގެނައި ހޮޅީންގެ ނުރައްކަލުން ރާއްޖެ މިންޖުކޮށްދެއްވި ހިތްވަރުގަދަ ގައުމީ ޖިހާދަށް މިއަދަށް 281 އަހަރުވެފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ހުރަވީ ދުވަހާ ގުޅިގެން އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ ދޮންބަންޑާރައިންގެ ހިކުމަތާއި ހުޝިޔާރުކަމާއި މި ވަތަންގެ މައްޗަށް އޮތް ކުލުނު ހާމަވި މި ތާރީހީ ހާދިސާއަށް ތިން ގަރުނު ވާން ކައިރިވީ އިރުވެސް އެ ހަނދާންތައް ޝުކުރުވެރިކަމާއެކު މި ފަސްގަނޑުގައި ވަނީ ދިރިދިރި ކަމަށެވެ. ފަހުރުވެރި ހުރަވީ ދުވަހުގެ ތަހުނިޔާ ދިވެހި ލޮބުވެތި ރައްޔިތުންނަށް އަރިސްކުރަނީ މިނިވަންކަމާއި ފާގަތިކަމުގައި ދިވެހިރާއްޖެ އަބަދުމެ ލެހެއްޓެވުން އެދި ދުއާ ދަންނަވަމުން ކަމަށް ރައީސް ވިދާޅުވިއެވެ.
ހޮޅިންގެ އަތްދަށުގައި ތިން މަސްދުވަހު ހޭދަވުމަށްފަހު 200 އެއްހާ ފަހުލަވާނުންގެ މައްޗަށް އެކުލެވޭ ލަޝްކަރެއް ތައްޔާރުކޮށް ދިވެހީން ހަނގުރާމައަށް ނުކުތީ މުލީގޭ ދޮން ހަސަން މަނިކުފާނުގެ ކޮމާންޑުގެ ދަށުންނެވެ.
ކޮމެންޓު ފޮނުވާ