ސަރުކާރާ ހަވާލުވެވަޑައިގެން ދެ އަހަރުފުރުން ފާހަގަކުރުމަށް ސޯޝަލް ސެންޓަރުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ މި ހިނގާ އަހަރުގެ ބަޖެޓަކީ 2020 ވަނަ އަހަރަށްފަހު އެންމެ ކުޑަ ޑެފިސިޓް ބަޖެޓު ކަމަށާއި، މިއީ އެއަހަރުން ފެށިގެން ސަޕްލިމެންޓަރީ ބަޖެޓަކާ ނުލައި ނިންމާލެވޭނެ ފުރަތަމަ އަހަރު ކަމުގައެވެ. މިއަހަރުގެ ބަޖެޓު ޑެފިސިޓް ފާސްކުރި 9.4 ބިލިއަން ރުފިޔާއަށް ވުރެ ކުޑަކޮށް ހުންނާނެ ކަމަށާއި، މިއަހަރުގެ ފުރަތަމަ 40 ހަފުތާވެސް ބަޖެޓު ޑެފިސިޓް ނުވެ ދިޔަ ކަމަށް ރައީސް ވިދާޅުވިއެވެ.
މާލީ ކާމިޔާބީތައް ތަފްސީލުކޮށްދެއްވަމުން ރައީސް ވިދާޅުވީ ސަރުކާރާ ހަވާލުވެވަޑައިގެންނެވި 2023 ނޮވެންބަރު 17 ގައި ސޮވަރިން ޑިވެލޮޕްމަންޓް ފަންޑުގައި ހުރީ އެންމެ 2 މިލިއަން ޑޮލަރާއި 2.4 މިލިއަން ރުފިޔާ ކަމަށާއި، ދެ އަހަރު ފަހުން މިހާރު އެ ފަންޑުގައި 126 މިލިއަން ޑޮލަރު ހުރި ކަމަށެވެ. ސަރުކާރުން އެޅި ހަރުދަނާ ފިޔަވަޅުތަކުގެ ސަބަބުން މިދިޔަ އޮކްޓޫބަރުން ފެށިގެން މިއަހަރުގެ އޮކްޓޫބަރުގެ ނިޔަލަށް ވިޔަފާރިތަކުން 584 މިލިއަން ޑޮލަރު ބޭންކުތަކަށް މާރުކޮށްފައިވާތީ ގްރޮސް ރިޒާވްގައި މިހާރު 866 މިލިއަން ޑޮލަރު ހުންނާނެ ކަމަށް ވެސް އެމަނިކުފާނު ވިދާޅުވިއެވެ.
މި ކުރިއެރުންތައް ހޯދީ ކުރީ ސަރުކާރުތަކުން ފުނި ޖައްސާފައި ހުރި ބިލުތަކަށް 444.3 މިލިއަން ރުފިޔާ ދައްކަމުން، ފައިސާ ޗާޕު ނުކޮށް، ގާނޫނާއި ގަވާއިދުތަކުގެ ތެރެއިން ކަމަށް ރައީސް ވިދާޅުވިއެވެ. ޕޭ ހާމަނައިޒޭޝަންގެ ތެރެއިން އެންމެ ކުޑަ އަސާސީ މުސާރަ 3،100 ރުފިޔާއިން 7،530 ރުފިޔާއަށް އިތުރުވެފައިވާ ކަމަށާއި، އެޑްމިނިސްޓްރޭޓިވް އޮފިސަރުންގެ މުސާރަ 63 އިންސައްތައާއި، މުދިމުންގެ މުސާރަ 133 އިންސައްތަ ކުރިއަރާފައިވާ ކަމަށް ވެސް އެމަނިކުފާނު ވިދާޅުވިއެވެ. ރަސްމީ ބަންދު ދުވަސްތަކާއި ރަމަޟާން މަހުގެ ފަހު 10 އަކާއި ރައީސުލްޖުމްހޫރިއްޔާގެ އޮފީހުން ބަންދުކުރާ ދުވަސްތައް އޯވަޓައިމް ކެޕްގެ ތެރެއިން އިސްތިސްނާކުރެވިފައިވާތީ މައިގަނޑު މައްސަލަ ހައްލުވެފައިވާ ކަމަށް ވެސް ރައީސް ވިދާޅުވިއެވެ.
ކޮމެންޓު ފޮނުވާ