ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން ދޫކުރާ ތިން ކޮޓަރީގެ ފްލެޓްތަކުގެ ކުލި 10،000 ރުފިޔާއަށް ވުރެ ބޮޑު ނުވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ސަރުކާރަށް ދެ އަހަރު ފުރުން ފާހަގަކުރުމުގެ ރަސްމިއްޔާތުގައި ވާހަކަދައްކަވަމުން ރައީސް ވަނީ މި ސަރުކާރުގެ އެންމެ ބޮޑު ވައުދު ކަމަށްވާ ގެދޮރުގެ ދަތިކަން ހައްލުކުރުމަށް މާލެ ސަރަހައްދުން 15،000 ގޯއްޗާއި 7،500 ފްލެޓް ދޫކުރާނެ ކަމަށް ހާމަކުރައްވާފައެވެ. އަދި އެމްއެމްއޭގެ އެންގުމާ އެކު ބީއެމްއެލްއިން ވަނީ 3،000 ފްލެޓް އެޅުމުގެ މަސައްކަތުގެ އެއްބަސްވުމުގައި ސޮއި ކޮށްފައެވެ.
އަންނަ ޖެނުއަރީ މަހު ހުޅުވާލާ ގޯއްޗާއި ފްލެޓަށް ހާއްސަކޮށްފައި ވަނީ އެންމެ ބޭނުން ޖެހިފައިވާ މީހުންނަށް ކަމަށާއި، ނަމަވެސް އެހެން މީހުންނަށް ފުރުސަތު ގެއްލުނީ ނޫން ކަމަށް ރައީސް ވިދާޅުވިއެވެ. 18 އަހަރުން މަތީގެ ބޯހިޔާވަހިކަމެއް ނެތް ހުރިހާ ދިވެހި ރައްޔިތުންނަށް ބޯހިޔާވަހިކަން ފޯރުކޮށްދިނުމަކީ ސަރުކާރުގެ ބޮޑު ވައުދު ކަމަށާއި، އެ ވައުދު ފުއްދުމަށް އިތުރު މަޝްރޫއުތައް ކުރިއަށް ގެންދާނެ ކަމަށް ވެސް އެމަނިކުފާނު ވިދާޅުވިއެވެ. ރަސްމާލެއަކީ މޮޑާން އިކޯ ސިޓީއެއްގެ ގޮތުގައި ތަރައްގީކުރާނެ ތަނެއް ކަމަށާއި، ޑިސެމްބަރުގައި ބޮޑެތި ޑްރެޖަރުތައް ރާއްޖެ ގެނެސް މާޗް ނުވަތަ އެޕްރީލް މަހުގެ ތެރޭގައި ރަސްމާލެ ހިއްކައި ނިންމާނެ ކަމަށް ރައީސް ވިދާޅުވިއެވެ.
ކޮމެންޓު ފޮނުވާ