މިދިޔަ ހަފުތާގެ ތެރޭގައި މާލެއާއި ސިނަމާލެ ބުރިޖުގައި ޖުމުލަ 54 އެކްސިޑެންޓު ހިނގައި އަށް މީހަކަށް އަނިޔާވެފައިވާ ކަމަށް ފުލުހުން ހާމަކޮށްފިއެވެ. އާދިއްތަ ދުވަހުން ފެށިގެން ހޮނިހިރު ދުވަހުގެ ނިޔަލަށް ހިނގި މި އެކްސިޑެންޓުތަކުގެ ތަފުސީލުތައް ފުލުހުން ހިއްސާކޮށްފައިވާއިރު، އެންމެ ގިނައިން އެކްސިޑެންޓުތައް ހިނގާފައިވަނީ މާލޭގައެވެ. މާލޭގައި 47 އަދި ސިނަމާލެ ބުރިޖުގައި ހަތް އެކްސިޑެންޓު ހިނގާފައިވެއެވެ.
އެކްސިޑެންޓުތަކުގެ ތެރެއިން ތިނެއް ސީރިއަސް އަދި 51 އެއް ކުޑަ އެކްސިޑެންޓުތަކަށް ވާއިރު، 43 އުޅަނދަކަށް އެކިވަރުގެ ގެއްލުންތައް ވެފައިވެއެވެ. އެންމެ ގިނައިން އެކްސިޑެންޓުތައް ހިނގާފައިވަނީ ހޯމަ ދުވަހު ކަމަށްވާއިރު، އެ ދުވަހު އެކަނި 13 އަދި އާދިއްތަ ދުވަހު 12 އެކްސިޑެންޓު ހިނގިއެވެ. އެކްސިޑެންޓުތަކުގެ ބާވަތަށް ބަލާއިރު، އެންމެ ގިނައިން ހިނގާފައިވަނީ ސައިކަލާއި ކާރު ޖެހިގެން ހިނގި 15 އެކްސިޑެންޓާއި ސައިކަލުތައް ޖެހިގެން ހިނގި 13 އެކްސިޑެންޓެވެ. ފުލުހުން މި ހިސާބުތައް އާންމުކުރި އިރު، މިދިޔަ ހޯމަ ދުވަހު ހުޅުމާލޭ ދެވަނަ ފިޔަވަހީގައި ހިނގި ނުރައްކާތެރި އެކްސިޑެންޓެއްގައި ޒުވާނަކު މަރުވިކަން ފާހަގަކުރެވެއެވެ.
ކޮމެންޓު ފޮނުވާ