ސަރުކާރަށް ދެ އަހަރު ފުރުމުގެ ޖަލްސާގައި ވާހަކަދައްކަވަމުން ރައީސް ޑރ. މުހައްމަދު މުއިއްޒު ވިދާޅުވީ، ދިވެހިރާއްޖޭގައި ހިޔާލުފާޅުކުރުމުގެ މިނިވަންކަން އޮންނާނީ ހަމައެކަނި އިސްލާމީ ޝަރީއަތުގެ ހުދޫދުގެ ތެރޭގައި ކަމަށެވެ. އެ ހުދޫދުން ބޭރުން ހިޔާލުފާޅުކުރަން ބޭނުންވާ ފަރާތްތަކުން އެހެން ޤައުމަކަށް ދާންޖެހޭނެ ކަމަށް ރައީސް ވިދާޅުވި އެވެ.
އާޓިފިޝަލް ބީޗުގައި ރޭ ބޭއްވި ޕީއެންސީގެ ބޮޑު އެއްވުމުގައި ރައީސް ވިދާޅުވީ، ބޭރުގެ އެކި ފަރާތްތަކުން ކިތަންމެ ބަޔާނެއް ނެރުނަސް އެކަމަކަށް ފަރުވާއެއް ނުބަހައްޓަވާނެ ކަމުގައެވެ. މީޑިއާ ރެގިއުލޭޓް ކުރާ ބިލާ ގުޅިގެން ރާއްޖެއާއި ބޭރުގެ ޖަމިއްޔާތަކުން ކަންބޮޑުވުން ފާޅުކުރި ނަމަވެސް، ސަރުކާރުން މި ސިޔާސަތު ބަދަލެއް ނުކުރާނެ ކަމަށް ރައީސް ސާފުކޮށްދެއްވި އެވެ.
ކޮންމެ މީހެއްގެ އަބުރާއި ކަރާމާތް ރައްކާތެރިކުރުމަށް ސަރުކާރުން ކޮމިޓްވާ ކަމަށާއި، އިސްލާމީ ހުދޫދުގެ ތެރެއިން ހިޔާލުފާޅުކުރުމުން އެއްވެސް މީހަކު އަޅައެއް ނުލާނެ ކަމަށް ރައީސް ޔަޤީންކަން ދެއްވި އެވެ. އަދި ހުއްދަ ނުހޯދައި އެއްވެވޭނެ ސަރަހައްދުތައް ފުޅާކޮށް، ރައްޔިތުންނަށް 24 ގަޑިއިރު އެއްވެވޭނެ އިންތިޒާމް ހަމަޖައްސާފައިވާ ކަމަށް ވެސް ރައީސް ފާހަގަކުރެއްވި އެވެ.
ކޮމެންޓު ފޮނުވާ