ރާއްޖެއިން ޑްރަގުގެ ވަބާ ނައްތާލުމަށް ކުރާ މަސައްކަތުގެ ދަށުން އެ ވިޔަފާރީގައި ބައިވެރިވާ މީހުންނާ ދެކޮޅަށް ހާއްސަ އޮޕަރޭޝަނެއް ފެށުމަށް ރައީސް މުހައްމަދު މުއިއްޒު ފުލުހުންނަށް އަންގަވައިފި އެވެ.
ރައީސް މިއަދު ސޯޝަލް މީޑިއާގައި ވިދާޅުވީ ރާއްޖެއަކީ ޑްރަގުގެ ވަބާ އިން އެއްކޮށް ސަލާމަތްވެފައިވާ ގައުމަކަށް ހެދުމަށް ސަރުކާރުން ގިނަ މަސައްކަތްތަކެއް ކުރަމުން އަންނަ ކަމަށެވެ. އެ މަނިކުފާނު ވިދާޅުވީ މި އޮޕަރޭޝަނުގައި އެއް ވަގުތެއްގައި ރާއްޖޭގެ 100އަށް ވުރެ ގިނަ ތަންތަން ބަލައި ފާސްކުރާނެ ކަމަށާއި 500އަށް ވުރެ ގިނަ ފުލުހުން އެ އޮޕަރޭޝަނުގައި ބައިވެރިވާނެ ކަމަށެވެ.
"އޮޕަރޭޝަން އަލިމަގު"ގެ ނަމުގައި ކުރިއަށް ގެންދާ މި އޮޕަރޭޝަން ފެށީ މިއަދު ހެނދުނު 5:30ގައެވެ. އިންޓެލިޖެންސް މައުލޫމާތުގެ މައްޗަށް ބިނާކޮށް މުޅި ރާއްޖެ ހިމެނޭ ގޮތަށް ހިންގާ މި އޮޕަރޭޝަންގައި ސްޕެޝަލައިޒްޑް ޑިޕާޓްމެންޓުތަކާއި ރީޖަންތަކުން ވިލަރެސްކޮށް އެކުލަވާލާފައިވާ ޓީމުތަކުން މުޅި ރާއްޖޭގެ 100އަށް ވުރެ ގިނަ ތަނުގައި އެއް ވަގުތެއްގައި ތަންތަން ބަލައި ފާސްކޮށް ގާނޫނު ތަންފީޒު ކުރުމުގެ އަމަލީ މަސައްކަތް އަންނަނީ ކުރަމުންނެވެ.
ފުލުހުން ބުނީ މިއީ މި ފަހުގެ އަހަރުތަކުގައި އެންމެ ފުޅާ ދާއިރާއެއްގައި މަސްތުވާތަކެއްޗާ ދެކޮޅަށް ހިންގާ ހަރަކާތް ކަމަށެވެ. މިއީ ރާއްޖޭގައި ހަރަކާތްތެރިވާ މަސްތުވާތަކެތީގެ ވިޔަފާރިކޮށް ޓްރެފިކްކުރާ ވިއުގަތައް ހުއްޓުވައި އެ ވިއުގަތައް މުޅިން ނައްތާލުމަށާއި މުޖުތަމައުގައި މަސްތުވާތަކެތި ފެތުރުމުގައި ޒިންމާވާ ފަރާތްތައް ގާނޫނުގެ ކުރިމައްޗަށް ގެނައުމަށް ކުރެވޭ ދެމެހެއްޓެނިވި މަސައްކަތްތަކުގެ ތެރެއިން ހިންގޭ އޮޕަރޭޝަނެއް ކަމަށް ވެސް ފުލުހުން ބުންޏެވެ.
ކޮމެންޓު ފޮނުވާ