އައްޑޫ ސިޓީ ހިތަދޫގައި ހުންނަ ފުލުހުންގެ ކަސްޓޯޑިއަލް ކުއްޔަށް މަސްތުވާތަކެތި ވެއްދި މައްސަލައިގައި ހިދުމަތުގައި ހުރި ފުލުހަކު ހައްޔަރު އޭނާގެ މައްޗަށް ދައުވާކުރަން ޕްރޮސެކިއުޓަ ޖެނެރަލްގެ އޮފީހަށް ފޮނުވައިފިއެވެ.
ފުލުހުން މިއަދު ހާމަކުރި ގޮތުގައި، މި މައްސަލައިގައި ހައްޔަރުކުރީ ޕޮލިސް ކޮންސްޓަބަލް މުހައްމަދު ނައުފް ނަސީމް، 25 އަހަރު، ސ. ހިތަދޫ، ފުނަގެއެވެ. އޭނާ ހައްޔަރުކުރީ މިދިޔަ ސެޕްޓެމްބަރު 4 ވަނަ ދުވަހު ކަސްޓޯޑިއަލްއަށް މަނާތަކެތި ވައްދާކަމަށް މައުލޫމާތު ލިބިގެން ހިންގި އޮޕަރޭޝަނެއްގައެވެ. އެ ރޭގެ 10:54 ހާއިރު އޭނާ ބަލައިފާސްކުރުމުން އޭނާގެ އަތުން މަސްތުވާތަކެތި ކަމަށް ބެލެވޭ އެއްޗެތި ފެނިފައިވެއެވެ.
އެ މައްސަލައިގައި ނައުފްގެ ބަންދަށް ކޯޓުން 15 ދުވަސް ވަނީ އަމުރުކޮށްފައެވެ. އެ މުއްދަތު ހަމަވެ، އޭނާ ސެޕްޓެމްބަރު 20 ވަނަ ދުވަހު ދޫކޮށްލިއިރު، މިދިޔަ މަހުގެ 13 ވަނަ ދުވަހު ތަހުގީގު ނިންމައި އޭނާގެ މައްޗަށް ދައުވާކުރަން ޕީޖީ އޮފީހަށް ފޮނުވާފައިވާކަމަށް ފުލުހުން ބުނެއެވެ. ހައްޔަރުކުރި ދުވަހުން ފެށިގެން ނައުފް އޮތީ މުސާރަ ނުލިބޭ ގޮތަށް ވަޒީފާއިން ސަސްޕެންޑްކޮށްފައެވެ.
ކޮމެންޓު ފޮނުވާ