އެމެރިކާގެ ގާނޫނު ހަދާ މަޖިލިހަށް، ޓްރަމްޕްގެ ސަޕޯޓަރުން އިއްޔެ ދިން ހަމަލާއަށްފަހު، އެމެރިކާގެ ރައީސް ވަގުތުން މަގާމުން ދުރުކުރުމުގެ އަޑުތައް އެގައުމުގައި ގަދަ ވާން ފަށައިފިއެވެ.
މިހާރުގެ އިދިކޮޅު ޕާޓީ، ޑިމޮކްރަޓިކް ޕާޓީގެ، ކޮންގްރެސްގެ ތިރި ގެއާއި މަތިގޭގެ މެމްބަރުންވެސް ދަނީ އެރިކާގެ ރައީސް މަގާމުން ދުރުކުރުމަށް ގޮވާލަމުންނެވެ.
ޑިމޮކްރަޓިކް ސެނެޓަރއެއް ކަމުގައިވާ ޗަކް ޝޫމަރ ވަނީ، ވަގުތުން ވަގުތަށް ޓްރަމްޕް މަގާމުން ވަކިކުރުމަށް ގޮވާލާފައެވެ. އަދި ޓަރަމްޕް ވަގުތުން ވަގުތަށް މަގާމުން ދުރު ނުކުރެވިއްޖެނަމަ، އިމްޕީޗް ކުރެވިދާނެ ކަމަށްވެސް ސެނެޓްގެ ރައީސާ ނާންސީ ޕެލޯސީ ވަނީ ވިދާޅުވެފައެވެ.
އެމެރިކާގެ ގާނޫނު ހަދާ މަޖިލިސް މެދުވެރިކޮށް ޓްރަމްޕް މަގާމުން ދުރުކުރުމަށް ޑިމޮކްރޭޓުންގެ އިތުރުން ރިޕަބްލިކަނުންގެ ތާއީދުވެސް ބޭނުންވާނެއެވެ. އެހެންނަމަވެސް، މިހާތަނަށް އައިއިރު، މިކަމަށް ތާއީދު ކޮށްފައިވަނީ، ޑިމޮކްރަޓިކް ޕާޓީއަށް ނިސްބަތްވާ މަދު މެމްބަރުންކޮޅެއް ކަމަށް ޚަބަރުތައް ބުނެއެވެ.
ޓްރަމްޕް މަގާމުން ދުރުކުރުމުގެ އަޑުތައް އެމެރިކާގައި ގަދަވަމުން ދާއިރު، ޓްރަމްޕްވަނީ، ފުރަތަމަ ފަހަރަށް ބަލި ގަބޫލުކޮށް، ވީޑިއޯއެއް ޓުވިޓަރ މެދުވެރިކޮށް އާންމު ކޮށްފައެވެ.
މި ވީޑިއޯގައި ޓްރަމްޕް ވަނީ، ޖެނުރަރީ 20 ވަނަ ދުވަހު ހުވާކުރުމަށް ހަމަޖެހިފައިވާ އާސަރުކާރަށް ހުރިހާ ގޮތަކުންވެސް އެއްބާރުލުން ދެއްވާނެކަމަށް ވިދާޅުވެފައެވެ. އަދި ވަނީ، ޚިޔާލު ތަފާތުވުންތައް ނައްތާލާ އެއްބައިވަންތަ ވުމަށްވެސް ގޮވާލައްވާފައެވެ.
އަމިއްލަ ޓުވިޓަރ އެކައުންޓުން އާންމުކުރި މި ވީޑިއޯގައި ޓްރަމްޕް ވިދާޅުވެފައިވަނީ، "ބުދަ ދުވަހު ހިގައިދިޔަ ހަމަނުޖެހުންތަކުގެ ސަބަބުން ވަރަށްބޮޑު ހައިރާންކަމަކާ ކުއްލި ސިހުމެއް ލިބިވަޑަގެންފައިވާ" ކަމަށާ، އަދި "ހާލަތަށް ހަމަޖެހުން ގެނެސް ކަންކަން އާންމު ހާލަތަކަށް" ގެންނަން ޖެހޭކަމަށެވެ.
މިވީޑިއޯއަކީ، ބުދަދުވަހު ހިގި ހަމަނުޖެހުންތަކާ ގުޅިގެން، ޓުވިޓަރއިން ޓަރަމްޕްގެ ޓުވިޓަރ އެކައުންޑް ސަސްޕެންޑް ކުރުމަށްފަހު، އެޓުވިޓަރ އެކައުންޓުން ކޮށްފައިވާ ފުރަތަމަ ޕޯސްޓެވެ.
އެމެރިކާގެ ގާނޫނު ހަދާ މަޖިލިސް، ކެޕިޓަލް ހިލްއަށް މުޒާހިރާ ކުރާ މީހުން ދިން ހަމަލާތަކާއި ގުޅިގެން މިހާތަނަށް 68 މީހުން ހައްޔަރު ކޮށްފައިވާއިރު، މިހަމަ ނުޖެހުންތަކުގެ ނަތީއެއްގެ ގޮތުން 4 މީހަކު ވަނީ މަރުވެފައެވެ.
ކެޕިޓަލް ހިލްއަށް ދިން ހަމަލާތައް ފުލުހުންނަށް ހުއްޓުވިފައި ނުވާތީ ކެޕިޓަލް ހިލްގެ ފުލުހުންނަށްވެސް މިހާރުދަނީ ވަރަށް ބޮޑެތި ފާޑުކިޔުންތަކެއް އަމާޒު ވަމުންނެވެ.
މިހަމަލާތައް ނުހުއްޓުވުމުގެ ޒިންމާ އުފުލާ، އެމެރިކާގެ ހައުސް އޮފް ރެޕްރެސެންޓޭޓިވްސްގެ ސާޖެންޓް އެޓް އާރަމްސް މިހާރުވަނީ އިސްތިއުފާ ދެއްވާފައެވެ. އަދި ބައެއް މީޑިއާ ރިޕޯޓްތައް ބުނާ ގޮތުގައި، ސެނެޓްގެ ރައީސާ އޭނާ އިސްތިއުފާ ދެއްވުމަށް ގޮވާލެއްވުމާއެކު، ޖެނުއަރީމަހުގެ 16 ވަނަ ދުވަހުންފެށިގެން މަގާމުން އިސްތިއުފާ ދެއްވުމަށް، ކެޕިޓަލްހިލްގެ ޕޮލިސް ޗީފްވެސް މިހާރުވަނީ ނިންމަވާފައެވެ.
ކެޕިޓަލްހިލްގައި ހިގައިދިޔަ ހަމަނުޖެހުންތައް ކުއްވެރިކޮށް، ޓަރަމްޕްގެ ސަރުކާރުގެ އިސް އޮފިޝަލުންވެސް ގެންދަވަނީ އިސްތިއުފާ ދެއްވަމުންނެވެ. މިހަމަލާ ކުއްވެރިކޮށް އެންމެފަހުން އިސްތިއުފާ ދެއްވާފައިވަނީ، ޓްރަމްޕްގެ ކެބިނެޓްގެ ޓްރާންސްޕޯޓު ސެކެޓްރީ އިލައިން ޗާއޯއެވެ.
މީގެ އިތުރުން އާދައިގެ މަގާމްތަކުގަ ތިބި ސަރުކާރުގެ އެތަކެއް އޮފިޝަލުންނެއް ވަނީ މި ހަމަލާ ކުއްވެރިކޮށް އިސްތިއުފާ ދެއްވާފައެވެ.
ޓްރަމްޕް މަގާމުން ދުރުކުރުން
އިތުރު ފުރުސަތެއް ނުދީ ޓްރަމްޕް މަގާމުން ދުރުކުރުމަށް މައިގަޑު ގޮތެއްގައި ގޮވާލަމުންދަނީ ބައިޑްން ނިސްބަތްވާ ޑިމޮކްރަޓިކް ޕާޓީގެ ސެނެޓަރުންނެވެ. އެހެންމަވެސް، ރިޕަބްލިކަން ޕާޓީގެ ބައެއް ސެނެޓަރުންވެސް މިހާރުދަނީ މިގޮވާލުންތައ ތަކުރާރު ކުރައްވަމުންނެވެ.
"އެމެރިކާގެ މިހާރުގެ ރައީސް އެންމެ ދުވަހަކުވެސް އިތުރަށް ވެރިކަމުގައު ބަހައްޓާއިގެން ނުވާނެ،" ސެނެޓް ފެބްރުއަރީމަހު އަލަށް ހުޅުވިގެން ދާއިރު، ރިޕަބްލިކަން ޕާޓީ އެންމެ އިސްކޮށް ތަމްސީލުކުރުމަށް ޖަމަޖެހިފައިވާ ޝޫމާ ވިދާޅުވިއެވެ.
އޭނާވަނީ، އެމެރިކާގެ ގާނޫނު އަސާސީގެ 25 ވަނަ މާއްދާއިން ލިބިދޭ ބާރުގެ ބޭނުން ކޮށްގެން ޓްރަމްޕް މަގާމުން ދުރުކުރުމަށް ގޮވާލައްވާފައެވެ. މިމާއްދާގައި ބުނަނީ، އެމެރިކާގެ ރައީސްގެ ނަފްސާނީ ނުވަތަ ޖިސްމާނީ ހާލަތުގެ ސަބަބުން މަގާމުގެ ވާޖިބްތައް އަދާ ކުރުމަށް ނުކުޅެދިއްޖެނަމަ، ނައިބް ރައީސް ޒިންމާތަކާ ހަވާލުވާނެ ގޮތުގެ ވާހަކަތަކެވެ.
މިމާއްދާގައިވާ ގޮތުން، ނާއިބް ރައީސް ޕެންސް މިކަމަށް އިސްނަންގަވާ އަދި ކެބިނެޓް 8 ވަޒީރަކު ޕެންސްއާއި ގުޅިވަޑައިގެން ޓްރަމްޕާއި ދެކޮޅަށް ތެޖުވެއްޖެ ނަަމަ، ޓްރަމްޕް މަގާމުން ދުރުކުރުމުގެ ފުރުސަތު ލިބިގެންޗދެއެވެ. އެހެންނަމަވެސް، ބެލެވިފައިވަނީ މިއީ ވުމަށްވުރެ ނުވުން ގާތްކަމެއްގެ ގޮތުގައެވެ.
ގާނޫނު އަސާސީގެ 25 ވަނަ މާއްދާގެ ބޭނުންކޮށްގެ ޓްރަމްޕް މަގާމުން ދުރުނުކޮށްފި ނަމަ، ގާނޫނު ހަދާ މަޖިލިހުން ޓްރަމްޕް މަގާމުން ދުރުކުރުމުގެ ފުރުސަތު އަދިވެސް އެބައޮތްކަމަށް ގާނޫނު ހަދާ މަޖިލީހުގެ ރައީސާ ނާންސީ ޕެލޯސީވަނީ ވިދާޅުވެފައެވެ. އެހެންނަމަވެސް، ޖެނުއަރީ 20 ގައި، ބައިޑްން ހުވާ ކުރުމާ ހަމައަށް ގާނޫނު ހަދާ މަޖިލިހުގެ އިތުރު ޖަލްސާތަކެއް ބޭއްވުމަށް ހަމަޖެހިފައެއ ނުވެއެވެ. އެހެން ނަމަވެސް، ޓްރަމްޕް މަގާމުން ދުރުކުރުމަށްޓަކާ ދައުރުން ބޭރުގެ ޖަލްސާތައް ބާއްވައިގެން މަގާމުން ދުރުކުރުމުގެ ފުރުސަތު އޮންނާނެއެވެ.
