އައްޑޫގައި މިހާރު ކުރިމަތިވެފައިވާ ކަރަންޓުގެ މައްސަލައަށް ދާއިމީ ހައްލެއް ހޯދުމުގެ މަސައްކަތް ހުއްޓާނުލައި ކުރަމުން އަންނަ ކަމަށް ފެނަކަ ކޯޕަރޭޝަނުން ބުނެފި އެވެ. އިއްޔެ މެންދުރުން ފެށިގެން ރޭގެ ވަގުތުތަކުގައި އައްޑޫގެ އެކި ސަރަހައްދުތަކުން ކަރަންޓު ކެނޑިގެން ގޮސްފައިވަނީ ސެންޓްރަލް ޕަވާ ސްޓޭޝަންގައި ހިންގާފައި ހުރި އިންޖީނަކަށް ޓެކްނިކަލް މައްސަލައެއް ދިމާވެގެން ލޯޑު މެނޭޖް ކުރުމުގެ ގޮތުން ކަމަށް ފެނަކައިން ހާމަކުރި އެވެ. އެ މައްސަލަ ހައްލުކޮށް ރޭ އައްޑޫގެ ހުރިހާ ރަށްތަކަށް ކަރަންޓު ދީފައިވާ ކަމަށާއި، ދާއިމީ ހައްލެއް ހޯދުމުގެ މަސައްކަތް ކުރިއަށްގެންދާނެ ކަމުގެ ޔަގީންކަން ފެނަކައިން ވަނީ އަރުވާފަ އެވެ. ރާއްޖޭގެ ދެވަނައަށް އެންމެ ބޮޑު އާބާދީ އޮންނަ އައްޑޫގެ ކަރަންޓު މައްސަލައަށް ދާއިމީ ހައްލެއް ނުލިބި އެތައް ދުވަހެއް ވަމުން އަންނައިރު، މިކަން ހައްލުކުރުމަށް ފެނަކައިން ދާދިފަހުން އައްޑުއަށް ޖަނަރޭޓަރުތައް ގެނެސްފައިވާއިރު، ދާއިމީ ހައްލެއް ލިބުމަށް އަހަރެއްހާ ދުވަސް ނަގާނެ ކަމަށް ވެސް ފެނަކައިން ބުނެފައިވެ އެވެ.
ކޮމެންޓު ފޮނުވާ