މާލޭގައި ތަންތަނަށް ވަދެ ތަކެތީގައި ގެއްލުންދިނުމުގެ މައްސަލަތަކުގައި އެކި ފަހަރު މަތިން ހައްޔަރުކޮށްފައިވާ މީހަކު އައިޖީއެމް ހޮސްޕިޓަލަށް ވަދެ ތަކެތީގައި ގެއްލުންދިން ކަމަށް ތުހުމަތުކުރެވޭ މައްސަލައެއްގައި އަނެއްކާވެސް ހައްޔަރުކޮށްފިއެވެ.
ހޯމަ ދުވަހު ހައްޔަރުކުރީ މ. ސްޓާރ މުޙައްމަދު ރަޒީނެވެ. ކްރިމިނަލް ކޯޓުން ރަޒީނުގެ ބަންދަށް ހަތް ދުވަހުގެ މުއްދަތެއް ދީފައިވާއިރު، ރަޒީނަކީ މިފަދަ މައްސަލަތަކުގައި ބަންދު ލޮގް އޮތް މީހެއް ކަމުން ބަންދުން ދޫކޮށްލައިފިނަމަ ކުށް ތަކުރާރުކުރާނެ ކަމަށް ކޯޓުން ފާހަގަކޮށްފައިވެއެވެ.
ފާއިތުވި އަހަރެއްހާ ދުވަހުގެ ތެރޭގައި ރަޒީނު އާއި ގުޅުންހުރި މައްސަލަތަކުގެ ތެރޭގައި މި އަހަރުގެ އޭޕްރީލްގައި ކެފޭއަކަށް ވަދެ ބިއްލޫރި ރެކެއް ތަޅާލުމާއި، އޯގަސްޓުގައި އެމްޑީޕީ ހަރުގެއަށް ގެއްލުންދިނުމާއި، ކުރީގެ އަނބިމީހާ މަސައްކަތްކުރާ އޮފީހާއި ދިރިއުޅޭ ގެއަށް ގޮސް އަޑުގަދަކުރުމާއި ހަލާކުކުރުމުގެ މައްސަލަތައް ހިމެނެއެވެ. އަދި މިދިޔަ އަހަރު އައިޖީއެމް ހޮސްޕިޓަލުގައި އަޑުގަދަކޮށް ފުލުހުންނަށް ނުކިޔަމަންތެރިވުމުގެ މައްސަލައެއްވެސް ހިމެނެއެވެ.
ރަޒީނަކީ ނަފްސާނީ ބަލިމީހެއްކަމަށް ކުރީގެ މީޑިއާ ރިޕޯޓްތަކުން ހާމަކޮށްފައިވާއިރު، ބަންދު އަމުރުގައި އުސޫލުން ބޭސް ފަރުވާގެ ކަންތައްތައް ކުރިއަށް ގެންދިއުމަށް އައި.އޯއަށް އަންގާފައިވާނެ ކަމަށް ބުނެފައިވެއެވެ.
ކޮމެންޓު ފޮނުވާ