އިންޓަނޭޝަނަލް ފެޑެރޭޝަން އޮފް އެސޯސިއޭޝަން ފުޓްބޯލް (ފީފާ)ގެ ރައީސް ޖިއާނީ އިންފަންޓީނޯ ރާއްޖެއަށް ކުރެއްވި ފުރަތަމަ ޒިޔާރަތަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޝުކުރުއަދާކުރައްވައިފިއެވެ.
ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް އަޙްމަދު ޠާރިޤްގެ ދައުވަތަކަށް އިންފަންޓީނޯ އިއްޔެ ރާއްޖެވަޑައިގެންނެވި ކަމަށް ރައީސުލްޖުމްހޫރިއްޔާ ކުރެއްވި ސޯޝަލް މީޑިއާ ޕޯސްޓެއްގައި ވިދާޅުވިއެވެ. ފީފާގެ ރައީސްއާއެކު ބޭއްވި ބައްދަލުކުރެއްވުމުގައި ރާއްޖޭގެ ފުޓްބޯޅަ ކުރިއެރުވުމަށް އެފްއޭއެމްގެ އެއްބާރުލުމާއެކު މަސައްކަތް ކުރުމާ ގުޅޭގޮތުން މަޝްވަރާކުރެއްވި ކަމަށްވެސް ރައީސް ވިދާޅުވިއެވެ.
މި ޒިޔާރަތުގައި ރާއްޖޭގެ ފުޓްބޯޅައިގެ ހާލަތާއި ވަސީލަތްތައް ހުރިގޮތް އިންފަންޓީނޯ ވަނީ ބައްލަވާލައްވާފައެވެ. އެފްއޭއެމްގެ ހިންގުން ހަރުދަނާކޮށް، ކުލަބުތަކުގެ މާލީ ނިޒާމް ރަނގަޅުކޮށް، ކުޅުންތެރިންގެ ހައްގުތައް ހޯދައިދިނުމަށް ކުރާ މަސައްކަތްތަކަށް ފީފާގެ ރައީސްގެ މި ދަތުރުފުޅުން އިތުރު ހިތްވަރާއި ބާރު ލިބިގެންދާނެކަމަށް ބެލެވެއެވެ.
ކޮމެންޓު ފޮނުވާ