ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ހައްދުންމަތީ އަތޮޅުގެ 11 ރަށަށް ކުރެއްވި ތިން ދުވަހުގެ ރަސްމީ ދަތުރުފުޅު ނިންމަވައި މިއަދު މާލެ ވަޑައިގަންނަވައިފިއެވެ.
އިސްދޫ، ކަލައިދޫ، ދަނބިދޫ، މާބައިދޫ، މުންޑޫ، ގަން، މާވަށް، ފޮނަދޫ، މާމެންދޫ، ހިތަދޫ އަދި ކުނަހަންދޫ ހިމެނޭގޮތަށް 11 ރަށަށް ޒިޔާރަތްކުރެއްވި މި ދަތުރުފުޅުގައި، ރައީސް ވަނީ ރަށު ކައުންސިލްތަކާއި އަންހެނުންގެ ކޮމިޓީތަކާއި ރައްޔިތުންނާ ބައްދަލުކުރައްވައި، އަތޮޅުގެ ތަރައްގީއަށް ބޭނުންވާ ކަންކަމާ ގުޅޭގޮތުން ފުޅާ ދާއިރާއެއްގައި މަޝްވަރާކުރައްވާފައެވެ. ސަރުކާރުގެ ވަޒީރުންނާއި ކުންފުނިތަކުގެ ވެރިން ހިމެނޭ ވަފުދެއް އެމަނިކުފާނުގެ އަރިހުގައި ބައިވެރިވެވަޑައިގެން، ކޮންމެ ރަށެއްގައިވެސް ފަށާފައިވާ އަދި ފެށުމަށް ހަމަޖެހިފައިވާ މަސައްކަތްތަކާ ގުޅޭ މައުލޫމާތު ފޯރުކޮށްދެއްވިއެވެ.
މި ދަތުރުފުޅުގައި ގެދޮރުވެރިކަން، ތައުލީމް، ސިއްހަތު، ހަށިހެޔޮކަމާއި ބޭންކިންގް ހިދުމަތްތަކާ ގުޅޭ ތަރައްގީގެ މަޝްރޫއުތައް ރަސްމީކޮށް ފައްޓަވައި އެއްބަސްވުންތަކުގައި ސޮއިކުރައްވާފައިވެއެވެ. މޫސުމުގެ ސަބަބުން ބައެއް މަޝްރޫޢުތައް ފައްޓަވައިދެއްވުން ލަސްވި ނަމަވެސް، އެކަންކަން ވަރަށް އަވަހަށް ނިންމަވައިދެއްވާނެކަމުގެ ޔަގީންކަން އެމަނިކުފާނު ރައްޔިތުންނަށް ދެއްވިއެވެ.
ގައުމީ މުހިންމު އިއުލާންތައް ކުރައްވަމުން، ރައީސް ވަނީ ލ. އަތޮޅަށް އިތުރު އެއާޕޯޓެއް ބޭނުންވާކަން ފާހަގަކުރައްވައި، އެންމެ ފައިދާހުރި ގޮތެއް ބެލުމަށްފަހު އަވަހަށް ގޮތެއް ނިންމަވާނެކަމުގެ ޔަގީންކަން ދެއްވާފައެވެ. އަދި ކައްދޫ އެއާޕޯޓް ބައިނަލްއަގްވާމީ އެއާޕޯޓެއްގެ ގޮތުގައި ގިނަވެގެން ތިން އަހަރުގެ ތެރޭގައި ތަރައްގީކުރައްވާނެކަމުގައިވެސް އިއުލާންކުރެއްވިއެވެ.
ރައްޔިތުންނަށް އުންމީދު އައުކޮށްދޭ މުހިންމު އިޢުލާނުތަކެއް ދެއްވަމުން، އަންނަ އަހަރުގެ ޖަނަވަރީން ފެށިގެން އެކަނިވެރި މައިންނަށް ދޭ އެލަވަންސް އިތުރުކުރައްވައި، ތެލަސީމިއާ ޕޭޝަންޓުންނަށް އެލަވަންސް ތަޢާރަފުކުރައްވާނެކަން އިއުލާންކުރެއްވިއެވެ. އަދި ވައުދުވެވަޑައިގެންނެވި ގޮތަށް ރާއްޖޭގައި މީހުން ދިރިއުޅޭ ހުރިހާ ރަށެއްގައި ފުލުހުންގެ ހިދުމަތް ގާއިމުކުރައްވާ ނިންމަވައިފައިވާކަންވެސް ރައީސް ވަނީ އިއުލާން ކުރައްވާފައެވެ.
ކޮމެންޓު ފޮނުވާ