މާލޭގެ ބޮޑުތަކުރުފާނުމަގުގެ އުތުރު ފަރާތު ފުޅާކޮށް ތަރައްގީކުރުމުގެ މަސައްކަތުގެ ދަށުން މަގުގައި ތާރުއެޅުމަށް، އަންނަ ހޮނިހިރު ދުވަހުން ފެށިގެން މަގުގެ ބައެއް ޓްރެފިކަށް ބަންދުކުރުމަށް ފުލުހުން ނިންމައިފިއެވެ.
ފުލުހުން ބުނެފައިވާ ގޮތުގައި ބޮޑުތަކުރުފާނުމަގު ޝަހީދު ހުސެން އާދަމް ބިލްޑިންއިން ފެށިގެން ހުސްނުހީނާ ގޯޅިއާ ހަމައަށް ޓްރެފިކަށް ބަންދުކުރާނެ އެވެ. މީގެ އިތުރުން މުހައްމަދު އިސްމާއީލްދީދީ ގޯޅި، ކަނޑި ދޮންމަނިކު ގޯޅި، ޖުމްހޫރީ ހިނގުން، ޗާންދަނީމަގު އަދި އިބްރާހިމް ހަސަން ދީދީ މަގު ފަދަ މަގުތައް ވެސް ބަންދުކުރުމަށް ވަނީ ހަމަޖެހިފަ އެވެ.
ޓްރެފިކަށް ބަންދުކުރުމުގެ އިތުރުން ބަންޑާރަ މިސްކިތާ ހަމައަށް ހުސްނީ ގޯޅި އަދި އޯކިޑުމަގުގެ ބައެއް ސަރަހައްދުގައި ޕާކުކުރުން ވެސް މަނާކޮށްފައިވާ ކަމަށް ފުލުހުން ހާމަކުރި އެވެ.
މިދިޔަ އޯގަސްޓު މަހު ފަށާފައިވާ ބޮޑުތަކުރުފާނުމަގު ފުޅާކުރުމުގެ މަޝްރޫއުގެ ދަށުން މަގުގެ އުތުރު ފަރާތުން ހަތަރު ލޭނަށް މަގު ހެދުމާއި، ހުޅުމާލެ ފެރީ ޓާމިނަލުން ފެށިގެން ލޯކަލް މާރުކޭޓާ ހަމަޔަށް 830 މީޓަރުގެ ސަރަހައްދެއްގައި ތާރުއެޅުމާއި، ދުވާރުތައް ހެދުމާއި، ފެން ހިންދާ ނިޒާމް ގާއިމުކުރުމާއި، ރޯޑް މާކިން އަދި ސައިން ބޯޑް ހަރުކުރުމުގެ މަސައްކަތްތައް ކުރަމުން އަންނަ އެވެ.
ކޮމެންޓު ފޮނުވާ