ގެދޮރުވެރިޔާ ސްކީމަށް އަލުން ކުރިމަތިލުމުގެ ފުރުސަތު އެޗްޑީސީން ހުޅުވާލާފައިވާ ކަމަށް ބުނެ، ދޮގު މެސެޖްތަކެއް ފެތުރެމުންދާތީ އެކަމަށް ސަމާލުވުމަށް ފުލުހުން ވަނީ ރައްޔިތުންނަށް އިލްތިމާސްކޮށްފައެވެ. މި މެސެޖްތަކުގައި ހިމެނޭ ލިންކުތަކަކީ މީހުންގެ ޒާތީ މައުލޫމާތާއި ޕާސްވޯޑް ވަގަށް ނެގުމަށް ތައްޔާރުކޮށްފައިވާ ސްކޭމް ލިންކުތަކެއް ކަމަށް ފުލުހުން ހާމަކުރައްވައެވެ.
މި މެސެޖްތަކުގައި ބުނެފައިވަނީ، ކުރިން ހުށަހެޅި ފޯމުތައް ބާޠިލުކޮށް އަލުން ފޯމު ހުށަހެޅުމުގެ ފުރުސަތު ހުރިހާ ރައްޔިތުންނަށް ހުޅުވާލާފައިވާ ކަމަށެވެ. ނަމަވެސް މިއީ ފުޅާ ދާއިރާއެއްގައި ރައްޔިތުން އޮޅުވާލުމަށް ފަތުރަމުން އަންނަ އަސްލެއް ނެތް ދޮގު މައުލޫމާތެއް ކަމަށް ފުލުހުން ތަކުރާރުކުރައްވައެވެ. އެހެންކަމުން، މިފަދަ މެސެޖްތަކުގައިވާ ލިންކުތަކަށް ފިތުމުން ދުރުހެލިވުމަށާއި، މެސެޖްތަކުގެ ހަގީގަތް ކަށަވަރުކުރުމަށް އެޗްޑީސީއަށް ސީދާ ގުޅައިގެން ހޯދުމަށް ފުލުހުން އިލްތިމާސްކުރައްވައެވެ.
ރާއްޖޭގައި ސްކޭމްގެ މައްސަލަތައް ދުވަހެއް ދުވަހަކަށް އިތުރުވަމުންދާތީ، މިފަދަ ހީލަތްތެރި އޮޅުވާލުންތަކުން ރައްކާތެރިވެ ބޮޑެތި ގެއްލުންތަކާ ކުރިމަތިނުލުމަށް އަބަދުވެސް ސަމާލުކަމާއެކު ތިބުމަށް ފުލުހުން ރައްޔިތުންނަށް ވަނީ ހަނދާންކޮށްދީފައެވެ.
ކޮމެންޓު ފޮނުވާ