ށ. ބިލެތްފަހީގައި ގާއިމުކުރާ އެއާޕޯޓުގެ މަސައްކަތް މިއަދުން ފެށިގެން 30 މަސްދުވަހުގެ ތެރޭގައި ނިމި، ފުރިހަމަ ހިދުމަތް ދެވޭނެ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
ބިލެތްފަހީ ރައްޔިތުންނާ ބައްދަލުކުރެއްވި ޖަލްސާގައި ވާހަކަދައްކަވަމުން ރައީސް ފާހަގަކުރެއްވީ މީގެކުރިން ސަރުކާރުތަކުން އެރަށުގައި ގިނަ މަޝްރޫއުތައް ހިންގަން ވައުދުވެފައިވިޔަސް ފުއްދުމެއް ނުލިބުން ކަމަށެވެ. އެހެންނަމަވެސް، މިހާރު ވައުދުވެވަޑައިގަންނަވަނީ އެކަންކަން ފުއްދޭނެކަމުގެ ފުރިހަމަ ޔަގީންކަން އޮވެގެން ކަމަށް އެމަނިކުފާނު ވިދާޅުވިއެވެ.
އެއާޕޯޓުގެ ތަރައްގީ އާއި އޮޕަރޭޝަނުގެ މަސައްކަތް ހަވާލުކޮށްފައިވަނީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއެވެ. އެމްއޭސީއެލްގެ އިންވެސްޓްމަންޓުން ހިންގާ މި މަޝްރޫއު އެއްވެސް މަޑުޖެހުމެއް ނެތި ނިންމާލެވޭނެ ކަމުގެ ޔަގީންކަން ރައީސް ރައްޔިތުންނަށް އަރުވާފައިވެއެވެ.
މިއަދު އެރަށުގައި ފަށާފައިވާ 36 ހެކްޓަރުގެ ބިންހިއްކުމުގެ މަސައްކަތް ގިނަވެގެން އަށްމަސްތެރޭގައި ނިމޭނެ ކަމަށާއި، އޭގެފަހުން ރަންވޭއާއި އެހެނިހެން ބައިތައް ހިމެނޭހެން މުޅި އެއާޕޯޓުގެ މަސައްކަތް ނިމޭނީ ދެއަހަރާއި ބައި ތެރޭގައި ކަމަށް ރައީސް ވިދާޅުވިއެވެ. މި އެއާޕޯޓުގައި 1،500 މީޓަރުގެ ރަންވޭއެއް ހިމެނޭނެއެވެ.
ށ. އަތޮޅުގެ އިގްތިސާދީ ކުރިއެރުމަށް މި އެއާޕޯޓުން ބޮޑު ދައުރެއް ކުޅޭނެ ކަމަށް ރައީސް ފާހަގަކުރެއްވިއެވެ.
ކޮމެންޓު ފޮނުވާ