މާލޭގައި ހިނގި ދެ މާރާމާރީގެ މައްސަލައާ ގުޅިގެން ފުލުހުން ހައްޔަރުކުރި ހަ މީހަކު ކްރިމިނަލް ކޯޓުން ވަނީ ބަންދުކޮށްފައެވެ.
މި މަސް 7 ވަނަ ދުވަހުގެ ހަވީރު ބޮޑުތަކުރުފާނު މަގު ފޯސްޓު އޮފީސް ކައިރީގައި ހިނގި މާރާމާރީގައި ދެ މީހުން ހައްޔަރު ކުރިއެވެ. އެއީ ތ. ގާދިއްފުށީ މުސްތަރީގެ ޝަމާލް ޙުސައިން އާއި ލ. މާމެންދޫ މުރިނގު ރަޖުވާން ލަޠީފެވެ. ސައިކަލެއްގައި ގޮސް ހިންގި މި ހަމަލާގައި ބައިވެރިވި ކަމަށް ތުހުމަތު ކުރެވޭ އެ ދެ މީހުންގެ ބަންދަށް ކޯޓުން 15 ދުވަހު ޖަހައިފިއެވެ.
އޭގެ އިތުރުން މި މަސް 4 ވަނަ ދުވަހުގެ ރޭ މއ. ރީނދޫމާގޭގެ ކައިރީގައި ހިނގި މާރާމާރީގައި ހަތަރު މީހުން ހައްޔަރު ކުރިއެވެ. ގުރޫޕު ހަދައިގެން ސައިކަލުގައި ގޮސް ޕާކު ކޮށްފައި ހުރި ސައިކަލެއްގައި އިން މީހަކަށް ނުރައްކާތެރި ހަތިޔާރުން ހަމަލާދިން މި މައްސަލައިގައި ގއ. މާމެންދޫ މޯރާ ޠާއިފް ރަފީޤު، ގދ. ރަތަފަންދޫ ސަންރައިސް އަމްސަލް ޢަބްދުﷲ، ލ. ގަން ތުނޑި ރޯސްބަޑް އަޙްމަދު ނީޒާދު އަދި ތިނަދޫ ގުލްބަކާގޭ ޢަބްދުﷲ އިސްރާޤް ހައްޔަރު ކުރިއެވެ. މި ހަތަރު މީހުން ވަނީ ޝަރީއަތުން ގޮތެއް ނިމެންދެން ބަންދުކޮށްފައެވެ.
ފުލުހުން ބުނީ މި ދެ މައްސަލަ އަދިވެސް ތަހުގީގު ކުރަމުންދާ ކަމަށެވެ.
ކޮމެންޓު ފޮނުވާ