ސަރުކާރުގެ ކެބިނެޓުގައި ހިމެނިވަޑައިގަންނަވާ ތިން މިނިސްޓަރެއްގެ މައްސަލަ އެންޓި ކޮރަޕްޝަން ކޮމިޝަން (އޭސީސީ)ން ބަލަން ފަށާފައިވަނީ ސިޔާސީ ރޭވުމެއްގެ ތެރެއިން އިދިކޮޅު ފަރާތްތައް ފަހަތަށް ޖައްސަން ކަމަށް ކުރީގެ ރައީސް އިބްރާހިމް މުހައްމަދު ސާލިހު މިއަދު ވިދާޅުވެއްޖެއެވެ.
އޭސީސީން މައްސަލަ ބަލާ ތިން ބޭފުޅުންނަކީ ކުރީގެ އެޑިއުކޭޝަން މިނިސްޓަރު ޑރ. އައިޝަތު އަލީއާއި، އިކޮނަމިކް މިނިސްޓަރު ފައްޔާޒް އިސްމާއިލް އަދި ފިނޭންސް މިނިސްޓަރުކަން ކުރެއްވި އިބްރާހިމް އަމީރެވެ. އެ ބޭފުޅުންނަށް އޭސީސީއަށް ހާޒިރުވުމަށް ވަނީ ޗިޓު ފޮނުވާފައެވެ.
މިކަމާ ގުޅިގެން މިއަދު އެކްސްގައި ކުރެއްވި ޕޯސްޓެއްގައި ސާލިހު ވިދާޅުވީ، މިހާރު މިކަން ހިނގަމުންދަނީ ދައުލަތުގެ މުއައްސަސާތަކުގެ މުސްތަގިއްލުކަން ގެއްލުވާލާފައިވާ ދަނޑިވަޅެއްގައި ކަމަށެވެ. އިންސާފުން އެއްކިބާވެ، ރައްޔިތުންގެ އަޑު ކަނޑުވާލައި، އިދިކޮޅު ސިޔާސީ ފަރާތްތައް ފަހަތަށް ޖައްސަން ރޭވިގެން ހިންގާ ކަމެއްގެ ގޮތުގައި އެ މަނިކުފާނު ވަނީ ސިफަކުރައްވާފައެވެ.
"މާޒީގައި މިކަން ހިނގައިދިޔަ ގޮތް އަޅުގަނޑުމެންނަށް އެބަ އެނގޭ. އިންސާފުން އެއްކިބާވެފައިވާ ތަހުގީގުތަކާއި، ސިޔާސީ ހުކުމްތަކުން މުޅި ގައުމު ކިލަނބުވާނެ،" ސާލިހު ވިދާޅުވިއެވެ. އެފަދަ ކަންކަމުން ދުރުވެ، އިންސާފާއި، ހަމަހަމަކަމާއި، ގާނޫނުގެ ވެރިކަން އިސްކުރަން ދައުލަތުގެ ވެރިންނަށް ވަނީ ގޮވާލައްވާފައެވެ.
ތިން މިނިސްޓަރުންގެ މައްސަލަ ބަލަނީ ސިޔާސީ ގޮތުން ފަހަތަށް ޖައްސައި، ބިރުދައްކަން ކަމަށް އެމްޑީޕީން އަންނަނީ ތުހުމަތުކުރަމުންނެވެ. އަމީރާއި ފައްޔާޒް ވެސް ވަނީ ގޯހެއް ހަދާފައިނުވާނެ ކަމަށް ވިދާޅުވެ، ނުރުހުން ފާޅުކުރައްވާފައެވެ. އޭސީސީން މިހާރު މަސައްކަތްކުރަނީ ވަޒީފާގެ ދިފާއުގައި ބޭއިންސާފުން މީހުން ފްރޭމްކުރަން ކަމަށް އަމީރު ވިދާޅުވިއެވެ.
ކޮމެންޓު ފޮނުވާ