ރާއްޖޭގެ މަސްވެރިކަމުގެ ސިނާއަތަށް ދިމާވެފައިވާ އެންމެ ބޮޑު ގޮންޖެހުން ކަމަށްވާ މަސް ރައްކާކުރާނެ ނިޒާމުގެ ދަތިކަން ހައްލުކޮށް، ކޯލްޑް ސްޓޯރޭޖްގެ ކެޕޭސިޓީ 25,000 މެޓްރިކް ޓަނަށް އިތުރުކުރުމަށް ސަރުކާރުން އަމާޒު ހިފައިފިއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވީ، ކޯލްޑް ސްޓޯރޭޖްގެ ކެޕޭސިޓީ ނެތުމުގެ ސަބަބުން މަސްވެރިކަން އެންމެ ރަނގަޅު ދުވަސްވަރު ބާނާ މަހަށް އެކަށީގެންވާ ހެޔޮ އަގެއް ނުލިބޭ ކަމަށެވެ. އަދި މަސްވެރިކަން ދަށް މޫސުމުގައި ބޭނުންކުރުމަށް މަސް ރައްކާކުރެވޭނެ އިންތިޒާމެއް ނެތުމަކީވެސް މި ސިނާއަތަށް އޮތް ބޮޑު ހުރަހެއްކަން ވަޒީރު ފާހަގަކުރެއްވިއެވެ.
ރާއްޖެއިން ޕްރޯސެސް ކޮށްގެން މަސް އެކްސްޕޯޓް ކުރުމަށް ސަރުކާރުން ޚާއްސަ އިސްކަމެއް ދީފައިވާއިރު، މިވަގުތު ރާއްޖޭގެ ކޯލްޑް ސްޓޯރޭޖް ކެޕޭސިޓީ ހުރީ އެންމެ 9,500 މެޓްރިކް ޓަނުގައެވެ. އެހެންކަމުން މި އަދަދު ތިން ގުނަ އިތުރުކޮށް، 25,000 ޓަނަށް ޖެއްސުމަކީ ސަރުކާރުގެ މައިގަނޑު އަމާޒު ކަމަށް ވަޒީރު ވިދާޅުވިއެވެ. މިކަމަށް ހައްލެއް ގެނައުމުގެ ގޮތުން މިހާރުވެސް ބައެއް ރަށްރަށުގައި ސްޓޯރޭޖް އެޅުމުގެ މަސައްކަތް ވަނީ ހަވާލުކުރެވިފައެވެ.
މިގޮތުން ކުރިއަށްދާ މަޝްރޫޢުތަކުގެ ތެރޭގައި ގއ. ކޫއްޑޫ އާއި ޅ. ފެލިވަރުން ކުރެ ކޮންމެ ރަށެއްގައި 4,000 ޓަނުގެ ކެޕޭސިޓީ ގާއިމުކުރުމާއި، ގދ. ތިނަދޫގައި 1,000 ޓަނު އަދި މ. މުލަކުގައި 500 ޓަނުގެ ސްޓޯރޭޖް އެޅުން ހިމެނެއެވެ. މީގެ އިތުރުން ކުރިއަށް ރޭވިފައިވާ މަޝްރޫޢުތަކުގެ ތެރޭގައި ހއ. އިހަވަންދޫގައި 1,000 ޓަނު، ސ. ހުޅުމީދޫގައި 500 ޓަނު، ތ. ހިރިލަންދޫ އާއި ކަނޑުއޮއްގިރީގައި 200 ޓަނުގެ ކެޕޭސިޓީ ގާއިމުކުރުން ހިމެނޭކަމަށް ވަޒީރު ހާމަކުރެއްވިއެވެ.
ވަޒީރު ޝިޔާމްގެ ވާހަކަފުޅު ނިންމަވާލައްވަމުން ވިދާޅުވީ، ދެމެހެއްޓެަނިވި ގޮތެއްގައި މަސްވެރިންނަށް ރަނގަޅު އަގެއް ހޯދައިދީ، މަސްވެރިކަމުގެ ސިނާއަތް އާ ހަރުފަތަކަށް ގެންދިއުމަށްޓަކައި ސްޓޯރޭޖް ކެޕޭސިޓީ އިތުރުކުރުމަކީ ކޮންމެހެން ކުރަންޖެހިފައިވާ މުހިންމު ކަމެއް ކަމަށެވެ.
ކޮމެންޓު ފޮނުވާ