ނިމިދިޔަ ސަރުކާރުގެ ގެދޮރުވެރިޔާ ސްކީމްގެ ދަށުން ފްލެޓަށް ޝަރުތުހަމަވެ 75 ޕޮއިންޓް ލިބުނު މީހުންގެ ތެރެއިން ބާކީ ތިބި މީހުންގެ މެދުގައި އިތުރު ގުރުއަތެއް ނުނަގާނެ ކަމަށާއި، ބާކީ ހުރި ދެ ކޮޓަރީގެ ފްލެޓުތައް ދޫކުރާނީ ނިކަމެތި ހާލުގައި އުޅޭ ފަރާތްތަކަށް އިސްކަންދީގެން ކަމަށް ހައުސިން މިނިސްޓަރު ޑރ. އަބްދުالله މުއްތަލިބު ވިދާޅުވެއްޖެއެވެ.
ކުރީ ސަރުކާރުން ކަނޑައަޅާފައި އޮތީ 76 ޕޮއިންޓަށްވުރެ މަތިން މާކްސް ލިބުނު މީހުންނަށް ތިން ކޮޓަރީގެ ފްލެޓް ދިނުމަށްފަހު، ބާކީވާ ފްލެޓްތައް 75 ޕޮއިންޓް ލިބުނު މީހުންގެ މެދުގައި ގުރުއަތުލައިގެން ދިނުމަށެވެ. ނަމަވެސް 76 ޕޮއިންޓް ލިބުނު 300 އަށްވުރެ ގިނަ މީހުންނަށް ފްލެޓް ހަމަނުޖެހި، 75 ޕޮއިންޓް ލިބުނު ބަޔަކަށް ފްލެޓް ލިބުނު މައްސަލަ ފެންމަތިވެ އެކަން އޭސީސީއަށް ވެސް ހުށަހެޅުނެވެ. މީގެ ކުރިން މިނިސްޓަރު ވަނީ ތިން ކޮޓަރީގެ ފްލެޓް ނުލިބޭ މީހުންނަށް ދެ ކޮޓަރީގެ ފްލެޓް ދިނުމުގެ ވިސްނުން ގެންގުޅުއްވާ ކަމަށް ވިދާޅުވެފައެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު މުއްތަލިބު ވިދާޅުވީ، މިހާރު ތިން ކޮޓަރީގެ ފްލެޓްތައް އެއްކޮށް ހަވާލުކޮށް ނިމިފައިވާ ކަމަށާއި ދެން ބާކީ ހުރީ ދެ ކޮޓަރީގެ ވަރަށް މަދު ފްލެޓްތަކެއް ކަމަށެވެ. އެހެންކަމުން 75 ޕޮއިންޓް ލިބި، މިދިޔަ އަހަރުގެ ނޮވެމްބަރު މަހު ނެގި ގުރުއަތުން ނުހޮވުނު 475 މީހުންގެ މެދުގައި އިތުރު ގުރުއަތެއް ނަގައިގެން ފްލެޓް ދިނުމުގެ އުސޫލު ކުރިއަށް ނުގެންދާނެ ކަމަށް އޭނާ ވިދާޅުވިއެވެ.
އޭގެ ބަދަލުގައި ސަރުކާރުން ނިންމާފައިވަނީ ބާކީ ހުރި މަދު ފްލެޓްކޮޅު، އެންމެ ނިކަމެތި ހާލުގައި އުޅޭ ފަރާތްތަކަށް އިސްކަންދީގެން ދޫކުރުމަށެވެ. މިނިސްޓަރު ފާހަގަކުރެއްވި ގޮތުގައި ކުރިން އޮތް ގޮތަށް ގުރުއަތު ނުނަގާ ތިބި ފަރާތްތަކަށް ވަކި ޚާއްސަ ގުރުއަތެއް ނުބާއްވާނެއެވެ. އަދި ބާކީ ހުރި ދެ ކޮޓަރީގެ ފްލެޓްތައް ދިނުމުގައި ބަލާނީ ނިކަމެތި ހާލަތަށް ރިއާޔަތްކޮށް ކަނޑައެޅޭ އުސޫލެއްގެ ތެރެއިން ކަމަށް ވެސް މިނިސްޓަރު ހާމަކުރެއްވިއެވެ.
މި މައްސަލައިގައި ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ވަނީ ސަރުކާރުގެ ވާހަކަތައް ދޮގުކުރައްވާފައެވެ. އަކްރަމް ވިދާޅުވީ 76 ޕޮއިންޓް ލިބި ފްލެޓް ކަށަވަރުނުވެ ތިބީ ދެ ފްލެޓަށް ޝަރުތުހަމަވާ ދެމަފިރިން ކަމަށާއި، އެފަދަ ފަރާތްތަކަށް ފްލެޓް ރިޒާވްކޮށްފައި ހުންނާނެ ކަމަށެވެ. އަދި މިހާރުގެ މިނިސްޓްރީން މަސައްކަތް ކުރަނީ ހަގީގަތް އޮޅުވާލުމަށް ކަމަށް އޭނާ ތުހުމަތުކުރެއްވިއެވެ.
ކޮމެންޓު ފޮނުވާ