ތ. އަތޮޅު ތަރައްގީގެ ރާޑަރަށް އެރުވުމަށް ކުރިން ވެވަޑައިގެންފައިވާ ވައުދު ފުއްދުމުގެ މަސައްކަތް ފައްޓަވައިފިކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ. އިއްޔެ ފެށުނު އާރުޓީއެލް ފެރީ ހިދުމަތަކީ މި މަސައްކަތުގެ ބައެއްކަމަށް އެމަނިކުފާނު ފާހަގަކުރެއްވިއެވެ.
ތ. އަތޮޅަށް ކުރައްވަމުންދާ ދަތުރުފުޅުގައި ރޭ ވޭމަންޑޫ ރައްޔިތުންނާ ބައްދަލުކުރެއްވުމުގައި ރައީސް ވިދާޅުވީ، އެ އަތޮޅުގެ ރަށްތައް ދުރުދުރުގައި ހުރުމުގެ ސަބަބުން ދަތުރުފަތުރުގައި ރައްޔިތުން ދިމާވަމުންދިޔަ ދަތިތަކަށް މި ފެރީ ނިޒާމުން ބޮޑު ލުޔެއް ލިބޭނެކަމަށެވެ.
ރައީސް މުއިއްޒު ވިދާޅުވިގޮތުގައި، ރިޔާސީ ބަޔާނުގައި މިއަހަރުގެ ފެބްރުއަރީ މަހު އިއުލާންކުރެއްވި ފަދައިން، ރާއްޖޭގެ ހުރިހާ އަތޮޅެއްގައި ފެރީ ނިޒާމު ޤާއިމުކުރުމުގެ މަސައްކަތް މިއަހަރު ނިމުމުގެ ކުރިން ފުރިހަމަކުރުމަށް އަމާޒުކުރި ނަމަވެސް، ބައެއް މަސައްކަތްތައް ފުރިހަމަކުރުމަށް އަންނަ އަހަރުގެ މާޗު މަހާ ހަމައަށް އިތުރު ވަގުތު ބޭނުންވާނެކަމަށް ވިދާޅުވިއެވެ.
މުޅި ރާއްޖެ ފެރީ ނިޒާމަކުން ގުޅުވައިލުމަށްފަހު، ކޮންމެ އަތޮޅަކަށް ވެސް ލޯންޗުތައް އިތުރުކޮށް، ދުރު ދަތުރުތައް ކައިރިކުރެވޭނެކަމަށް ރައީސް ވައުދުވެވަޑައިގަތެވެ. ތ. އަތޮޅުގެ ފެރީ ނިޒާމަށް ވެސް މުސްތަޤްބަލުގައި ލޯންޗުތައް އިތުރުކުރުމުގެ ރާވާ އޮތްކަމަށް އެމަނިކުފާނު ފާހަގަކުރެއްވިއެވެ.
ވޭމަންޑޫ ދަތުރުފުޅުގައި ރައީސް މުއިއްޒު ވަނީ އެ ރަށުގެ ތަރައްގީއަށް މުހިންމު ތިން މަޝްރޫއުގެ އެއްބަސްވުމުގައި ސޮއިކުރައްވާފައެވެ. އެމްޓީސީސީއާ އެކު ސޮއިކުރެވުނު އެއްބަސްވުމުގެ ދަށުން ވޭމަންޑޫއަށް 25 ހެކްޓަރުގެ ބިން ހިއްކައި، ބަނދަރު އަޕްގްރޭޑްކޮށް، މަގުތައް ތަރައްގީކުރާނެއެވެ.
މި މަޝްރޫއުތަކުގެ އަމަލީ މަސައްކަތް އަވަހަށް ފެށި، މެދުކެނޑުމެއްނެތި ނިމުމާ ހަމައަށް ކުރިއަށް ގެންދާނެކަމުގެ ޔަގީންކަން ރައީސް ދެއްވިއެވެ. މިއީ ތ. އަތޮޅު ތަރައްގީގެ ރާޑަރަށް އެރުވުމަށް ކުރެވޭ ފުޅާދާއިރާއެއްގެ މަސައްކަތުގެ ބައެއްކަމަށް އެމަނިކުފާނު ވިދާޅުވިއެވެ.
ކޮމެންޓު ފޮނުވާ