ތ. ވޭމަންޑޫގައި ގާއިމުކުރާ ފުލުހުންގެ އާ މަރުކަޒުގެ ބިންގާ އަޅައިފިއެވެ. މި މަޝްރޫއަކީ ރާއްޖޭގެ ހުރިހާ ރަށެއްގައި ފުލުހުންގެ ހިދުމަތް ފޯރުކޮށްދިނުމަށް ސަރުކާރުން ކުރިއަށްގެންދާ މުހިންމު މަސައްކަތުގެ ބައެކެވެ.
ރައީސް ޑރ. މުހައްމަދު މުއިއްޒު، ހަތަރު އަތޮޅެއްގެ 31 ރަށަކަށް ކުރައްވާ ދަތުރުފުޅުގައި ވޭމަންޑޫއަށް ވަޑައިގެން ބޭއްވި ރަސްމިއްޔާތެއްގައި މި މަރުކަޒުގެ ބިންގާ އެޅުއްވާފައިވަނީ ދާހިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހްސާނެވެ.
ސަރުކާރުން ބުނާގޮތުގައި 2026 ވަނަ އަހަރު ނިމުމުގެ ކުރިން ދިވެހިރާއްޖޭގެ ހުރިހާ ރަށެއްގައި ފުލުހުންގެ ހިދުމަތް ލިބޭނެ އިންތިޒާމު ހަމަޖެހިގެންދާނެއެވެ. މި ލަނޑުދަނޑި ހާސިލުކުރުމަށްޓަކައި ރަށްރަށުގައި ޕޮލިސް ސްޓޭޝަންތަކާއި، ޕޮލިސް ޕޯސްޓުތަކާއި، ޕޮލިސް ޑެސްކުތައް ގާއިމުކުރުމުގެ މަސައްކަތް ވަނީ ފެށިފައެވެ.
ރާއްޖޭގައި ކުށްތައް މަދުކޮށް، ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް ސަރުކާރުން ކުރާ މަސައްކަތުގެ ތެރޭގައި، ހާއްސަކޮށް މަސްތުވާތަކެތީގެ ވަބާއާއި ގޭންގް މާރާމާރީ ހުއްޓުވުމަށް ވަނީ ހާއްސަ އިސްކަމެއް ދީފައެވެ. ރާއްޖޭގެ އެކި ސަރަހައްދުތަކުގައި ފުލުހުންގެ ހިދުމަތް ފުޅާކޮށް، ކުށްކުރުން ހުއްޓުވައި، އަމަންއަމާންކަން ދެމެހެއްޓުމަށް ކުރެވޭ މަސައްކަތުގެ ތެރޭގައި ވޭމަންޑޫގައި މި އާ މަރުކަޒު ގާއިމުކުރުމަކީ މުހިންމު ފިޔަވަޅެކެވެ.
ކޮމެންޓު ފޮނުވާ