ގާޒާގައި ދެމުންދާ ހަނގުރާމަ ނިންމާލުމަށްފަހު އެ ސަރަހައްދު ހިންގުމުގައި ހަމާސް ޖަމާއަތަށް އެއްވެސް ބައިވެރިވުމެއް ދެވޭނެ ކަމަކަށް ނުދެކޭ ކަމަށް ފަލަސްތީނުގެ ރައީސް މަހުމޫދު އައްބާސް ހާމަކުރައްވައިފި އެވެ.
އ.ދ ގެ ބައްދަލުވުމެއްގައި ވީޑިއޯ ލިންކް މެދުވެރިކޮށް ވާހަކަފުޅު ދައްކަވަމުން ރައީސް އައްބާސް ވިދާޅުވީ، ހަނގުރާމަ ހުއްޓުމާއެކު 12 މަސްދުވަހުގެ މުއްދަތެއްގެ ތެރޭގައި އާންމު އިންތިހާބެއް ބޭއްވުމަށް ތައްޔާރުވަމުންދާ ކަމަށެވެ. މި ބައްދަލުވުމަކީ ފްރާންސް ސަރުކާރުން އިސްނަގައިގެން ބޭއްވި ބައްދަލުވުމެކެވެ.
ފަލަސްތީނުގެ މީހުން އެދެނީ އަމާންކަމާއެކު ސިޔާސީ ބާރުތައް ބަދަލުވެ، އައު ދައުރެއް ފެށިގެންދިއުން ކަމަށް އައްބާސް ފާހަގަކުރެއްވި އެވެ. މީގެ އިތުރުން ހަމާސް ޖަމާއަތާއި އެނޫންވެސް މިލިޝިއާ ގުރޫޕުތަކުން އަތުގައި ހުރި ހަތިޔާރުތައް ފަލަސްތީނު އޮތޯރިޓީއާ ހަވާލުކުރުމަށް އެދިވަޑައިގެންނެވި އެވެ.
އޮކްޓޫބަރު 7 ގައި ހަމާސް އިން އިޒްރޭލުގެ ރައްޔިތުން ރަހީނުކޮށްފައިވާތީ، އެ އަމަލު ރައީސް އައްބާސް ވަނީ ހަރުކަށި އިބާރާތުން ކުށްވެރިކުރައްވާފަ އެވެ.
ރައީސް އައްބާސްގެ މި ބަޔާން ނެރުއްވީ، ބައިނަލްއަގްވާމީ މުޖުތަމައުގެ ފަރާތްތަކުން ފަލަސްތީނު ދައުލަތް ރަސްމީކޮށް ބަލައިގަތުން އިތުރުވަމުންދާ ވަގުތެއްގަ އެވެ. ނަމަވެސް މި ގައުމުތަކުގެ ތެރެއިން ގިނަ ގައުމުތަކުން ބުނަނީ، އައު ފަލަސްތީނު ސަރުކާރެއް އެކުލަވާލާއިރު ހަމާސް އެއްކޮށް ބައިވެރިނުވާން ޖެހޭނެ ކަމަށެވެ.
އިޒްރޭލުގެ ދެމެހެއްޓެނިވި ހަމަލާތަކުގެ ސަބަބުން ގާޒާގައި 65،000 އަށްވުރެ ގިނަ މީހުން މަރުވެ، ލައްކަ އެއްހާ މީހުންނަށް ޒަހަމްވެފައިވާ ކަމަށް ފަލަސްތީނު ސިއްހީ އޮފިޝަލުން ބުނެ އެވެ.
ކޮމެންޓު ފޮނުވާ