ވ. އަތޮޅު ފުލިދޫގައި ބީއެމްއެލްގެ އޭޓީއެމް ހިދުމަތް މިއަދު ރައީސް ޑރ. މުހައްމަދު މުއިއްޒު ފަށްޓަވައިދެއްވައިފިއެވެ. މި ހިދުމަތް ފަށްޓަވައިދެއްވީ ރައީސުލްޖުމްހޫރިއްޔާ ހަތަރު އަތޮޅަކަށް ކުރައްވަމުން ގެންދަވާ ދަތުރުފުޅުގެ ތެރެއިން ފުލިދޫއަށް މިއަދު ވަޑައިގެން ބޭއްވި ހާއްސަ ރަސްމިއްޔާތެއްގައެވެ.
މި ރަސްމިއްޔާތުގައި ރައީސް މުއިއްޒު ވަނީ ހަނދާނީ ބޭންކު ކާޑެއް ފުލިދޫ ކައުންސިލާ ހަވާލުކުރައްވާފައެވެ. މިއީ ރަށުގެ ތަރައްޤީއަށް މުހިންމު ފިޔަވަޅެއް ކަމުގައި ރައްޔިތުން ދެކެމެވެ.
ބީއެމްއެލުން ބުނި ގޮތުގައި، ފުލިދޫގައި ޤާއިމްކޮށްފައިވާ މި އޭޓީއެމުން އަމިއްލަ ފަރުދުންނާއި ވިޔަފާރިތަކަށް 24 ގަޑިއިރު ފައިސާ ނެގުމާއި ޖަމާކުރުމުގެ ހިދުމަތް ލިބޭނެއެވެ. މީގެ އިތުރުން ބިލްތަކަށް ފައިސާ ދެއްކުމާއި ފައިސާ ޓްރާންސްފާ ކުރުމުގެ ހިދުމަތްވެސް މި އޭޓީއެމުން ލިބެން ހުންނާނެއެވެ.
ބީއެމްއެލުން މުޅި ރާއްޖޭގައި އޭޓީއެމް ބެހެއްޓުމަށް ހިންގާ މަޝްރޫއުގެ ދަށުން މިހާތަނަށް 11 އަތޮޅުގެ މީހުން ދިރިއުޅޭ ހުރިހާ ރަށެއްގައި އޭޓީއެމް ބަހައްޓާ ނިމިފައިވާކަމަށް ބޭންކުން މަޢުލޫމާތު ދެއެވެ. މި ހިދުމަތް މިހާތަނަށް ފެށިފައިވާ އަތޮޅުތަކުގެ ތެރޭގައި އއ. އަތޮޅާއި ހއ. އަތޮޅު، ހދ. އަތޮޅާއި ށ. އަތޮޅު، ދ. އަތޮޅާއި ނ. އަތޮޅު، މ. އަތޮޅާއި ކ. އަތޮޅު، ބ. އަތޮޅުގެ އިތުރުން ގއ. އަދި ގދ. އަތޮޅު ހިމެނެއެވެ.
މި މަޝްރޫއަކީ ރާއްޖޭގެ ހުރިހާ ރަށެއްގައި ބޭންކިންގ ހިދުމަތްތައް ފޯރުކޮށްދިނުމަށް ސަރުކާރުން ހިންގާ މުހިންމު މަޝްރޫއެކެވެ. މިއާއެކު ވ. އަތޮޅުގެ ރައްޔިތުންނަށް ބޭންކިންގ ހިދުމަތްތައް ލުއިފަސޭހަކަމާއެކު ލިބޭނެ މަގު ފަހިވެގެން ދާނެއެވެ.
ކޮމެންޓު ފޮނުވާ