ރާއްޖޭގެ އެކި ސަރަހައްދުތަކުގައި ހަ އެއާޕޯޓް ތަރައްޤީކުރުމަށް ޖަމާކޮށްފައިވާ 87 މިލިއަން ޑޮލަރަށް ވީގޮތާމެދު ކުރީގެ ރައީސް އިބްރާހިމް މުހައްމަދު ސޯލިހް މިރޭ ސުވާލު އުފައްދަވައިފިއެވެ.
ބޮޑުފުޅަދޫ ރައްޔިތުންނާ ބައްދަލުކުރެއްވި ޖަލްސާއެއްގައި ވާހަކަފުޅު ދައްކަވަމުން ރައީސް ސޯލިހް ވިދާޅުވީ، އެމަނިކުފާނުގެ ސަރުކާރުން މަކުނުދޫ، ބިލެއްދޫ، ބެރިއަންފަރު، ތުޅާދޫ، މަގޫދޫ އަދި ވިލުފުށީގައި އެއާޕޯޓް އެޅުމަށް ނިންމައި، އެކަމަށް ބޭނުންވާ މުޅި ފައިސާ ހޯދައި ޖަމާކޮށްފައިވާ ކަމަށެވެ. އެހެންނަމަވެސް ދެ އަހަރު ފާއިތުވާން ދާއިރުވެސް މިހާރުގެ ސަރުކާރުން އެއިން އެއްވެސް މަޝްރޫއެއް ފަށާފައި ނުވާތީ، އެ ފައިސާއަށް ވީގޮތަކީ ކޮބައިކަން ސާފުނުވާ ކަމަށް އެމަނިކުފާނު ފާހަގަކުރެއްވިއެވެ.
ކައްދޫ އެއާޕޯޓް ތަރައްޤީކުރުމަށް 10 މިލިއަން ޑޮލަރު ވެސް ހޯދައި ބަހައްޓާފައިވާ ކަމަށް ރައީސް ސޯލިހް ވިދާޅުވިއެވެ. އެ ފައިސާއަށް ވެސް ވީގޮތެއް ނޭނގޭ ކަމަށް އެމަނިކުފާނު ވިދާޅުވިއެވެ.
މި ޖަލްސާގައި ރައީސް ސޯލިހް، މިހާރުގެ ސަރުކާރުން ލާމަރުކަޒީ ނިޒާމަށް ގެނެސްފައިވާ ބަދަލުތަކަށް ވެސް ފާޑުވިދާޅުވިއެވެ. މި ބަދަލުތަކުގެ ސަބަބުން ކައުންސިލްތަކަށް މާލީ މުއާމަލާތްތައް ހިންގޭނެ ގޮތެއް ނެތިފައިވާ ކަމަށާއި، ދައުރުގެ ފަހު އަހަރު ކައުންސިލްތަކުގެ މަސައްކަތްތައް ހުއްޓިފައިވާ ކަމަށް އެމަނިކުފާނު ވިދާޅުވިއެވެ. 2028 ގައި އެމްޑީޕީއަށް ވެރިކަން ލިބުމުން މި ބަދަލުތައް އުވާލައި، ލާމަރުކަޒީ ނިޒާމުގެ ބާރުތައް އަލުން ކައުންސިލްތަކަށް ދޫކޮށްލާނެ ކަމަށް ރައީސް ސޯލިހް ވިދާޅުވިއެވެ.
އެމަނިކުފާނުގެ ވެރިކަމުގައި ފެށި އާރުޓީއެލް ފެރީ ހިދުމަތް މުޅި ރާއްޖެއަށް ފުޅާނުކުރެވި އޮތުމަށް ވެސް ރައީސް ސޯލިހް ފާޑުވިދާޅުވިއެވެ. އެމްޑީޕީގެ ސަރުކާރެއް އޮތްނަމަ 2024 ވަނަ އަހަރުގެ ޖޫން މަހާ ހަމައަށް އާރުޓީއެލް ހިދުމަތް މުޅި ރާއްޖެއަށް ފެށިފައި އޮންނާނެ ކަމަށް އެމަނިކުފާނު ވިދާޅުވިއެވެ.
ކޮމެންޓު ފޮނުވާ