ކައުންސިލްތަކަށް ސަރުކާރުން ފޯރުކޮށްދޭ ބްލޮކް ގްރާންޓްގެ ފައިސާ ބެހުމަށް މިހާރު ބޭނުންކުރާ ފިސްކަލް ފޯމިއުލާއަށް މުހިންމު ބަދަލުތަކެއް ގެނައުމަށް ރައީސް ޑރ. މުޙައްމަދު މުޢިއްޒު ނިންމަވައިފިއެވެ. އާ ފޯމިއުލާގައި ރަށުގެ ބޮޑުމިނަށް ރިއާޔަތްކުރެވޭނެ އުޞޫލެއް ހިމެނޭނެ ކަމަށް ރައީސް ވިދާޅުވެފައިވެއެވެ.
އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގެ 79 ވަނަ މާއްދާގެ ދަށުން ކައުންސިލްތަކަށް ދެވޭ މި އެހީ ބެހުމުގައި މިހާރު ބޭނުންކުރާ ފޯމިއުލާގައި މައިގަނޑު ގޮތެއްގައި އާބާދީއަށް ބުރަދަން ދީފައިވާކަން ރައީސް މުޢިއްޒު އެކްސްގައި ކުރެއްވި ޕޯސްޓެއްގައި ފާހަގަކުރެއްވިއެވެ. މިކަމުގެ ސަބަބުން އާބާދީ މަދު ރަށްތަކުގެ ކައުންސިލްތަކަށް ލިބޭ ފައިސާގެ މިންވަރު މަދުވާކަމަށް ރައީސް ވިދާޅުވިއެވެ.
އާބާދީ މަދުނަމަވެސް ބިމުގެ ގޮތުން ބޮޑެތި ރަށްތަކުގައި މަގުތަކާއި މުނިސިޕަލް ޚިދުމަތްތަކާ ގުޅޭ ގިނަ މަސައްކަތްތަކެއް ކުރަންޖެހޭކަން ރައީސް ފާހަގަކުރެއްވިއެވެ. އެހެންކަމުން މިފަދަ ކައުންސިލްތަކަށް ޒަރޫރީ ޚިދުމަތްތައް ފޯރުކޮށްދިނުމާއި ތަރައްޤީގެ މަސައްކަތްތައް ކުރިއަށް ގެންދިއުމުގައި ދަތިތަކާ ކުރިމަތިވާކަމަށް ވެސް ރައީސް ވިދާޅުވިއެވެ.
މިހާރު އޮތް ނިޒާމުގެ ދަށުން ބައެއް ކައުންސިލްތަކަށް ގެއްލުން ލިބޭކަން ފާހަގަކުރައްވައި، ރައީސް މުޢިއްޒު ވިދާޅުވީ ފިސްކަލް ފޯމިއުލާ މުރާޖާކުރުމުގައި ރަށުގެ ބޮޑުމިނަށް ވެސް ރިއާޔަތްކުރެވޭނެ ގޮތަކަށް ބަދަލު ގެނައުމަށް ނިންމަވާފައިވާ ކަމަށެވެ.
މި ބަދަލުތައް 2026 ވަނަ އަހަރުގެ ބަޖެޓާއެކު ރައްޔިތުންގެ މަޖިލީހަށް ހުށަހެޅޭނެކަމަށް ރައީސް ވިދާޅުވެފައިވެއެވެ. އާ ފޯމިއުލާގެ ދަށުން އާބާދީ ކުޑަނަމަވެސް ބިމުގެ ގޮތުން ތަނަވަސް ރަށްތަކަށް ކުރިމަތިވާ މާލީ ދަތިކަން ހައްލުވެގެންދާނެ ކަމަށް އުންމީދުކުރެވެއެވެ.
ކޮމެންޓު ފޮނުވާ