އިސްރާއީލުން ޣައްޒާ ސިޓީ ބާރުގެ ދަށަށް ގެނައުމަށް ކުރިއަށް ގެންދާ ފުޅާދާއިރާގެ އޮޕަރޭޝަންތަކުގައި އިއްޔެ 105 ފަލަސްތީނީން ޝަހީދުވެފައިވާ ކަމަށް ރިޕޯޓުތައް ބުނެއެވެ. ގާތްގަނޑަކަށް އެއް މިލިއަން މީހުން ދިރިއުޅޭ ޣައްޒާގެ އެންމެ ބޮޑު ސިޓީއަށް އިސްރާއީލުން ދިން ވައިގެ ހަމަލާތަކުގައި ޝަހީދުވި މީހުންގެ ތެރޭގައި އެހީ ހޯދުމުގައި އުޅުނު 32 މީހުން ހިމެނޭ ކަމަށް ވަނީ ރިޕޯޓުކުރެވިފައެވެ.
ޣައްޒާގެ ދެކުނުގައި ހުންނަ ޚާން ޔުނިސް ސަރަހައްދުގެ ކައިރީގައި އޮންނަ އަލްމަވާސީ ސަރަހައްދުގައި ފެން ހޯދަން ނިކުތް ބަޔަކަށް އިސްރާއީލުން ފޮނުވާލި ޑްރޯން ހަމަލާއެއްގައި 21 މީހުން ޝަހީދުވެފައިވާއިރު، އޭގެ ތެރޭގައި ހަތް ކުޑަކުދިން ހިމެނޭ ކަމަށް ލޯކަލް ރިޕޯޓުތައް ބުނެއެވެ. މި ހަމަލާތަކުގައި އާންމު ރައްޔިތުންނާއި ކުޑަކުދިން ޝަހީދުވުމުން ބައިނަލްއަޤުވާމީ މުޖުތަމައުގައި ކަންބޮޑުވުން އިތުރުވަމުން އަންނަ ކަމަށް ފާހަގަކުރެވެއެވެ.
މީގެ އިތުރުން އިސްރާއީލުގެ އެންމެ ފަހުގެ ހަމަލާތަކުގައި ދެ ނޫސްވެރިން ޝަހީދުވެފައިވާ ކަމަށް ވަނީ ރިޕޯޓުކުރެވިފައެވެ. އަލް މަނާރާ ޓީވީގެ ނޫސްވެރިން ކަމަށްވާ ރަސްމީ ސަލީމާއި އީމާން އަލް ޒަމްލީ ޝަހީދުވުމާއެކު 2023 ވަނަ އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން މި ހަނގުރާމައިގައި ޝަހީދުވި ނޫސްވެރިންގެ އަދަދު 270 އަށް ވުރެ މައްޗަށް އަރައިފައިވާ ކަމަށް މީޑިއާ ޖަމްޢިއްޔާތަކުން ބުނެއެވެ.
އިސްރާއީލާއި ޣައްޒާ އާ ދެމެދު ހިނގަމުންދާ ހަނގުރާމައިގައި އާންމު ރައްޔިތުންނަށް ލިބޭ ގެއްލުންތައް އިތުރުވަމުން ދިއުމާ ގުޅިގެން ބައިނަލްއަޤުވާމީ ފެންވަރުގައި ވަގުތުން ސުލްހަވެރި ހައްލެއް ހޯދުމަށް ގޮވާލުންތައް ވަނީ އިތުރުވެފައެވެ. ޚާއްޞަކޮށް އެހީތެރިކަން ހޯދަން އުޅޭ މީހުންނާއި ކުޑަކުދިންނަށް ލިބޭ ގެއްލުންތައް ކުޑަކުރުމަށް ފިޔަވަޅު އަޅަންޖެހޭ ކަމަށް އިންސާނީ ޖަމްޢިއްޔާތަކުން ވަނީ ފާހަގަކޮށްފައެވެ.
ކޮމެންޓު ފޮނުވާ