އެސްއޯއީ ކޮމެޓީން ވެސް ޝުޖާއު ވަކިކޮށްފި

ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހީމް ޝުޖާއު، މަޖިލީހުގެ އެސްއޯއީ ކޮމެޓީން ވެސް ވަކިކޮށްފައިވާކަން އެނގިއްޖެއެވެ. މިއީ ޝުޖާއު މުގައްރިރުކަން ކުރައްވާ ކޮމެޓީ ކަމުގައި ވީނަމަވެސް، އިއްޔެ މާލިއްޔަތު ކޮމެޓީން ވަކިކުރުމަށްފަހު، މިއަދު އެސްއޯއީ ކޮމެޓީން ވެސް ވަކިކޮށް، ތަރިކައިގެ ކޮމެޓީއަށް ބަދަލުކޮށްފައި ވަނީ އޭނާއެވެ.

މި ބަދަލު ގެނެސްފައިވަނީ، ޝުޖާއު އާއި އޭނާގެ ގުޅުން ހުރި ކުންފުނިތަކަށް ނާޖާއިޒު ފައިދާތަކެއް ހޯދައިދިނުމަށް ބޮޑު އަދަދެއްގެ ފައިސާގެ މުއާމަލާތްތަކެއް ކޮށްފައިވާކަމަށް ބުނެ، މޯލްޑިވްސް މަނިޓަރީ އޮތޯރިޓީގެ ފައިނޭންޝަލް އިންޓަލިޖެންސް ޔުނިޓުން ތައްޔާރުކޮށްފައިވާ ރިޕޯޓެއްގެ މައްސަލަ، ފުލުހުންނާއި އެންޓި ކޮރަޕްޝަން ކޮމިޝަނުން ތަހުގީގުކުރަމުން ދަނިކޮށެވެ.

މާލިއްޔަތު ކޮމެޓީގައި ޝުޖާއުގެ ބަދަލުގައި ގުރައިދޫ ދާއިރާގެ ޕީއެންސީ މެންބަރު ހަނާން މުހައްމަދު ރަޝީދު ހަމަޖައްސާފައިވާއިރު، ޝުޖާއު ބަދަލުކޮށްފައިވަނީ ތަރިކައާ ބެހޭ ކޮމެޓީއަށެވެ.

ސޯޝަލް މީޑިއާގައި މިދިޔަ ހޮނިހިރު ދުވަހުގެ ރޭ ފެތުރުނު އެފްއައިޔޫގެ ރިޕޯޓުގައި ފާހަގަކޮށްފައިވާ ގޮތުގައި، 2023 ވަނަ އަހަރުގެ ނޮވެންބަރު މަހުގެ ފުރަތަމަ ދުވަހުން ފެށިގެން މިދިޔަ އަހަރުގެ ޖެނުއަރީ މަހުގެ ނިޔަލަށް، ޝުޖާއު އާއި އޭނާގެ ގުޅުން ހުރި ކުންފުނިތަކަށް ސަރުކާރުގެ އެކި މުއައްސަސާތަކުން 42.5 މިލިއަން ރުފިޔާ ދޫކޮށްފައިވެއެވެ.

މި ފައިސާ ލިބިފައިވާ ކުންފުނިތަކުގައި ހިމެނެނީ އޮފިޝަލް އިވެންޓްސް، ސްޓޯ ޕްރޯސް ޓްރޭޑިން، ކުއިކް ޝުއާ އަދި ޑީކިއު ހޯލްޑިންސްއެވެ. އޮފިޝަލް އިވެންޓްސް އަކީ ޝުޖާއުގެ ހިއްސާ އޮތް ކުންފުންޏެއް ކަމަށާއި، ސްވޯން އަކީ ޝުޖާއު އާއި އޭނާގެ އާއިލާގެ ކުންފުންޏެއް ކަމަށާއި، ކުއިކް ޝެއާ އަކީ ފިޝަރީޒް މިނިސްޓްރީގެ ޑެޕިއުޓީ މިނިސްޓަރު މުހައްމަދު ނާފިޒުގެ ހިއްސާ އޮތް ކުންފުންޏެއް ކަމަށް ރިޕޯޓުގައި ބުނެފައިވެއެވެ. ނާފިޒަކީ ޝުޖާއު އާއި އާއިލީ ގޮތުން ގުޅުމެއް ހުރި ފަރާތެކެވެ.

ރިޕޯޓުގައި ވިދާޅުވާ ގޮތުގައި، ރައީސް ޑރ. މުހައްމަދު މުއިއްޒު ވެރިކަމުގެ ހުވާ ކުރެއްވި ރަސްމިއްޔާތު ތައްޔާރުކުރި ސިފައިންގެ ކުންފުނި ސިވެކަށް، 2023 ވަނަ އަހަރުގެ ނޮވެންބަރު 13 ގައި ފިނޭންސް މިނިސްޓްރީން 23 މިލިއަން ރުފިޔާ ދޫކޮށްފައިވާއިރު، އޭގެ ތެރެއިން 13 މިލިއަން ރުފިޔާ ސިވެކުން އޮފިޝަލް އިވެންޓްސް އަށް ފޮނުވާފައިވެއެވެ.

އޮފިޝަލް އިވެންޓްސް އަށް ލިބުނު 13 މިލިއަން ރުފިޔާގެ ތެރެއިން ޑީކިއު ހޯލްޑިންސް އަށް 4.2 މިލިއަން ރުފިޔާ އާއި ކުއިކް ޝުއާ އަށް 2.3 މިލިއަން ރުފިޔާ ފޮނުވާފައިވާ ކަމަށް ރިޕޯޓުގައި ބުނެފައިވެއެވެ. މީގެ އިތުރުން، އޮފިޝަލް އިވެންޓްސް އަށް ލިބުނު ފައިސާގެ ބައެއް ބޭނުންކޮށްގެން އަގުބޮޑު ދެ އެޕާޓުމަންޓެއް ގަނެފައިވާ ކަމަށް ވެސް ރިޕޯޓުގައި ހާމަކޮށްފައިވެއެވެ. އެއް ފްލެޓަކީ ޝުޖާއު ގަތް ފްލެޓެއް ކަމަށާއި، އަނެއް ފްލެޓަކީ އޮފިޝަލް އިވެންޓުގެ ހިއްސާދާރު އަދި ޕީއެސްއެމްގެ ބޯޑު މެންބަރު އަހުމަދު އަދުހަމް ގަތް ފްލެޓެއް ކަމަށް ރިޕޯޓުގައި ފާހަގަކޮށްފައިވެއެވެ. މި ފްލެޓުތަކުގެ އަސްލު އަގަކީ 20 މިލިއަން ރުފިޔާ ކަމަށް ވެސް ބުނެފައިވެއެވެ.

އެފްއައިޔޫގެ ރިޕޯޓު އާންމުވުމާ ގުޅިގެން ފުލުހުން ބުނެފައިވަނީ، މި މައްސަލަ ތަހުގީގު ކުރަމުންދާ ކަމަށެވެ. އެންޓި ކޮރަޕްޝަން ކޮމިޝަނުން ވެސް ބުނެފައިވަނީ، މި ރިޕޯޓުގެ މައްސަލަ ބަލަމުން އަންނަތާ ދުވަސްތަކެއް ވެފައިވާ ކަމަށެވެ. އެހެންނަމަވެސް، މިހާތަނަށް ޝުޖާއު ނުވަތަ ރިޕޯޓުގައި ނަން ހިމެނޭ އެހެން ފަރާތްތަކާ ސުވާލު ކޮށްފައިވާ ކަމެއް އެއްވެސް އިދާރާއަކުން ހާމަކޮށްފައެއް ނުވެއެވެ. ޝުޖާއު ވިދާޅުވެފައިވަނީ މި ރިޕޯޓަކީ ސައްޙަ ރިޕޯޓެއްކަން ކަށަވަރު ނުވާކަމުގައެވެ.