އެމެރިކާގެ ރައީސް ޑޮނަލްޑް ޓްރަމްޕް ހައްރުކުރުމުގެ ރެޑް ނޯޓިސް އަމުރު، އިރާންގެ އެދުމުގެ މަތިން، އިންޓަޕޯލްއިން ނެރެފިއެވެ.
އިރާނުގެ ޖުޑިޝަރީގެ ތަރުޖާމާން، ގޮލާމްހުސެއިން އިސްމާއީލީ ބޭއްވި ޚާއްސަ ޕްރެސް ކޮންފަރެންސެއްގައި ވިދާޅުވި ގޮތުގައި، އިރާނުންވަނީ، އެގައުމުގެ އަސްކަރިއްޔާގެ އިސް ޖެނެރަލް ގައްސާމް ސުލައިމާނީ އަވާހަކޮށްލުމުގެ ތުހުމަތުގައި، އެމެރިކާގެ ރައީސްގެ އިތުރުން މިޖަރީމާގައި ބާއިވެރިވެފައިވާ އިތުރު 47 މީހަކު ހައްޔަރުކުމުގެ ރެޑް ނޯޓިސް ނެރެދިނުމަށް، އިންޓަރނޭޝަނަލް ޕޮލިސް އޯގަނިޒޭޝަން (އިންޓަރޕޯލް)ގައި އެދިފައެވެ.
"އިސްލާމިކް ރިޕަބްލިކް އޮފް އިރާންއިން ދަނީ، ވަރަށް ސީރިއަސްކަމާއެކު، މިހަމަލާ ދިނުމަށް އަމުރުކުރި މީހުންނާ އަދި މިހަމަލާދިން މީހުންނަށް ހައްގު އަދަބުދިނުމަށް މަސައްކަތް ކުރަމުން،" އިސްމާއީލީ ރިޕޯޓަރުންނަށް މައުލޫމާތު ދެމުން ވިދާޅުވެފައި ވެއެވެ.
އިރާނުގެ ރިވޮލިއުޝަނަރީ ގާޑް ކޯޕްސްއިން ގައުމުން ބޭރުގައި ހިންގާ ހުރިހާ އޮޕްރޭޝަނެއްގެ އެންމެ އިސް ކޮމާންޑަރެއްގެ ގޮތުގައި ހުންނެވި، ގައްސާމް ސުލައިމާނީ ޝަހީދު ކޮށްލާފައިވަނީ، އެމެރިކާގެ ރައީސް ޑޮނަލްޑް ޓްރަމްޕްގެ އޯޑަރަށް އެމެރިކާގެ އަސްކަރިއްޔާއިން ދިން ޑްރޯން ހަމަލާއެއްގައި، އިރާގުގެ އެއަރޕޯޓް ކައިރިން، 2020 ވަނަ އަހަރުގެ ޖެނުއަރީ މަހުގެ 3 ވަނަ ދުވަހުއެވެ.
ޔޫއެންގެ އިންސާނީ ހައްގުތަކާއި، އަދި އިންސާނިއްޔަތާ ޚިލާފް އަމަލްތަކާބެހޭ ޚާއްސަ މަންދޫބު، އޭންސް ކަލަމާޑް ވިދާޅުވެފައިވަނީ، މި ޖަރީމާއަކީ ބައިނަލްއަގުވާމީ ހުރިހާ ގާނޫނަކާވެސް ޚިލާފަށް އެމެރިކާއިން ހިންގާފައިވާ ޖަރީމާއެއް ކަމުގައެވެ.
މިއީ އެމެރިކާގެ ރައީސް ޑޮނަލްޑް ޓްރާމްޕާއި އަދި، މީގެއިތުރުން، އެމެރިކާގެ ދިފާއީ ވުޒާރާ ޕެންޓަގަންއާއި އަދި ސެންޓަރަލް ކޮމާންޑްގެ އިސް އެތަކެއް އޮފިޝަލުން ހައްޔަރުކުރުމަށް އިރާންއިން ނެރުނި މިފަދަ ދެވަނަ ނޯޓިސްްއެވެ.
ފާއިތުވެދިޔަ އަހަރުގެ ޖޫމަހު، ތެހެރާންގެ ޕްރޮސެކިއުޓަރ އަލީ އަލްގަސިމެހެރު ވަނީ، "ގަތުލު އާންމު ހިންގުމާއި އަދި ޓެރަރިޒަމްގެ އަމަލްތައް" ހިންގުމުގެ ތުހުމަތުގައި، އެމެރިކާގެ ރައީސްގެ އިތުރުން އެމެރިކާގެ އެތަކެއް އިސް އޮފިޝަލުންތަކެއް ހައްޔަރުމަށް އެރެސްޓް ވޮރެންޓެއް ނެރެފައެވެ.
އެހެންނަމަވެސް، ފްރާންސްގައި ހުންނަ އިންޓްޕޯލްއިން ވަނީ، އެފަހަރު އިރާނުން އެދުނު އެދުމާއި ދެކޮޅު ހަދާފައެވެ. އެ އޯގަނިޒޭޝަނުން އޭރު ބުނެފައިވަނީ، ދޭދޭ ގައުމުތަކުގެ ދެމެދުގައި ހިގާ ސިޔާސީ، އަސްކަރީ، ދީނީ، އަދި ނަސްލީ މައްސަލަތަކުގެ ތެރެއަށް ވަނުމަކީ އެ އޯގަނިޒޭޝަންގެ އަސާސީ ގަވާއިދުން ތަންދޭ ކަމެއް ނޫންކަމަށް ބުނެއެވެ.
އެމެރިކާގެ ރައީސްއާއި އަދި އެގައުމުގެ އިސް އޮފިޝަލުންގެ މައްޗަށް ދައުވާ ކުރުމުގެ ވާހަކަށް އަލުން ފެށިފައިވަނީ، ގައްސާމް ސުލައިމާނީ އަވަހާރަ ކޮށްލިތާ އެއްހަރު ވެގެންދާއިރު، މި ހަމަލާގެ ބަދަލު ހިފާނެކަމުގެ ވައުދު އިރާނުން އާކުރަމުންދާ ދަޑިވަޅެއްގައެވެ.
އަދި މިވާހަކަތައް ދެކެވެން ފަޝާފައި މިވަނީ، އެމެރިކާގެ ރައީސް ޑޮނަލްޑް ޓްރަމްޕް ވެރިކަމުގެ ދައުރު ފުރިހަމަ ކުރައްވާ ވަޑައިގަންނަވަން 2 ހަފްތާއަށް ވެފައި ވަނިކޮށެވެ. އިރާނުން ގަބޫލު ކުރާގޮތުގައި، އެމެރިކާގެ ރައީސް ވެރިކަމުން ދުރަށް ވަޑައިގެންނެވުމުން، އިންސާފު ގާއިމްކުރުމުގައި އިތުރު ފަސޭހަތަކެއް ލިބިގެން ދާނެއެވެ.
ސުލައިމާނީގެ މަރަށް 1 އަހަރުފުރުން ފާހަގަ ކުރުމަށް ބޭއްވުނު ރަސްމިއްޔާތުގައި އިރާނުގެ ޖުޑިޝިއަރީގެ އެންމެ އިސްފަރާތްކަމުގައިވާ، އިބްރާހިމް ރައިސީ ވިދާޅުވީ ސުލައިމާނީގެ މަރުގެ މައްސަލާގައި އެގައުމުން ދައުވާކުރުމަށް ބޭނުންވާ އެންމެ މުހިންމު ފަރާތަކީ ޓްރަމްޕް ކަމުގައެވެ. އަދި ޓްރަޕްގެ ސިޔާސީ ހައިސިއްޔަތުގެ ސަބަބުން، މިދައުވާއަށް އެއްވެސް ހުރަހެއް އެޅިގެން ނުވާނެ ކަމަށްވެސް އޭނާ ވިދާޅުވިއެވެ.
