ތ. ވޭމަންޑޫގައި އައިޑީކާޑު ޕްރިންޓުކޮށް ދޫކުރުމުގެ ހިދުމަތް މިއަދު ފަށައިފި އެވެ. މި ހިދުމަތް ފެށުމުން ވޭމަންޑޫގެ ރައްޔިތުންނަށް ރަށުގައި ތިބެގެން އައިޑީކާޑު ހެއްދުމުގެ ފަސޭހަކަން ލިބިގެންދާނެ ކަމަށް ހޯމް މިނިސްޓްރީން ބުނެފައި ވެއެވެ.
ވޭމަންޑޫގައި މި ހިދުމަތް ފެށުމާއެކު، ރާއްޖޭގެ 27 ރަށެއްގައި މިހާރު އައިޑީކާޑު ޕްރިންޓުކޮށް ދޫކުރުމުގެ ހިދުމަތް ލިބެން ހުރި ކަމަށް ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރު) އިން މަޢުލޫމާތު ދެއްވި އެވެ. ޑީއެންއާރުގެ ޕްލޭނަކީ މި އަހަރު ނިމުމުގެ ކުރިން ރާއްޖޭގެ ހުރިހާ އަތޮޅެއްގައި މި ހިދުމަތް ގާއިމުކުރުމެވެ.
ސަރުކާރުގެ މުހިންމު ސިޔާސަތެއްގެ ގޮތުގައި، ރާއްޖޭގެ މީހުން ދިރިއުޅޭ ކޮންމެ އަތޮޅަކުން ނުވަތަ އަތޮޅުވެރިކަން ކުރާ ރަށަކުން އައިޑީކާޑުގެ ހިދުމަތް ފޯރުކޮށްދިނުމަށް ކުރަމުންދާ މަސައްކަތުގެ ތެރެއިން، މިހާތަނަށް ވަރަށް ބޮޑު ކުރިއެރުންތަކެއް ލިބިފައިވާ ކަމަށް ސަރުކާރުން ބުނެއެވެ.
ރާއްޖެއިން ބޭރުގައި ތިބި ދިވެހިންނަށް މި ހިދުމަތް ފޯރުކޮށްދިނުމުގެ މަސައްކަތްވެސް ކުރިއަށްދާ ކަމަށް ޑީއެންއާރުން ހާމަކުރި އެވެ. މިގޮތުން މެލޭޝިއާގައި މި ހިދުމަތް ވަނީ ފަށައިފަ އެވެ. އަދި ސްރީލަންކާ، އިންޑިއާ އަދި އިނގިރޭސިވިލާތުގައިވެސް މި ހިދުމަތް ގާއިމުކުރުމުގެ މަސައްކަތް ކުރިއަށްދާ ކަމަށް ޑީއެންއާރުން ބުނި އެވެ.
އައިޑީކާޑު ޕްރިންޓުކޮށް ދޫކުރުމުގެ ހިދުމަތް ރައްޔިތުންނާ ގާތުން ދިނުމުގެ މަސައްކަތް ފުރަތަމަ ފަށާފައިވަނީ މިދިޔަ އަހަރުގެ ނޮވެންބަރު މަހުގެ ތެރޭގަ އެވެ. މާލެ ސަރަޙައްދުން ބޭރުން މި ހިދުމަތް އެންމެ ފުރަތަމަ ގާއިމުކުރީ ގއ. ވިލިނގިލީގަ އެވެ. އޭގެ ފަހުން އެކި އަތޮޅުތަކުގެ ރަށްތަކުގައި މި ހިދުމަތް ފުޅާކުރަމުން އައިސް، މިހާރު ވޭމަންޑޫގައިވެސް މި ހިދުމަތް ފެށިފައިވާ އިރު، އަހަރު ނިމުމުގެ ކުރިން ހުރިހާ އަތޮޅެއްގައި މި ހިދުމަތް ލިބޭނެ ގޮތް ހަމަޖެހިގެންދާނެ ކަމަށް ޑީއެންއާރުން ޔަޤީންކަން ދެއެވެ.
ކޮމެންޓު ފޮނުވާ