އުތުރު ކޮރެޔާގެ ލީޑަރު ކިމް ޖޮންގ އުން، އޭނާގެ ދަރިކަނބަލުން ކިމް ޖޫ އައި އަދި އަނބިކަނބަލުން ރި ސޮލް ޖޫ ބައިވެރިވެވަޑައިގެން، 20,000 މީހުންގެ ޖާގައިގެ ބޮޑު ރިސޯޓެއް އެ ޤައުމުގައި ރަސްމީކޮށް ހުޅުވައިދެއްވިއެވެ. މި ރިސޯޓަކީ އެ ޤައުމުން ފަތުރުވެރިކަން ކުރިއެރުވުމަށް ކުރަމުންދާ މަސައްކަތުގެ މުހިންމު ބައެއް ކަމުގައި ކިމް ވިދާޅުވިއެވެ.
ރިސޯޓު ހުޅުވުމުގެ ރަސްމިއްޔާތުގެ ފަހުން ކިމް އެ ތަން ބައްލަވައިލެއްވުމަށްފަހު ވިދާޅުވީ، މި ރިސޯޓަކީ 2025 ވަނަ އަހަރު އުތުރު ކޮރެޔާއަށް ލިބޭނެ އެންމެ ބޮޑު ކާމިޔާބީތަކުގެ ތެރެއިން އެއް ކާމިޔާބީ ކަމަށެވެ. އަދި މިއީ އުތުރު ކޮރެޔާގެ ފަތުރުވެރިކަން ތަރައްޤީކުރުމުގެ ސިޔާސަތު ތަންފީޒުކުރުމުގެ ފުރަތަމަ ފިޔަވަޅު ކަމުގައި ވެސް އޭނާ ފާހަގަކުރެއްވިއެވެ.
އުތުރު ކޮރެޔާއަށް ދިމާވެފައިވާ އިޤްތިޞާދީ ގޮންޖެހުންތަކުން އަރައިގަތުމަށްޓަކައި، އެ ޤައުމު ފަތުރުވެރިންގެ މަންޒިލަކަށް ހެދުމަށް ކިމް ޖޮންގ އުން ކުރައްވަމުންދާ މަސައްކަތުގެ ބައެއް ގޮތުގައި މި ރިސޯޓު ބެލެވެއެވެ. މީގެ އިތުރުން އެހެން ސަރަޙައްދުތަކުގައި ވެސް މިފަދަ ރިސޯޓުތައް ތަރައްޤީކުރުމަށް އެ ޤައުމުން ރާވަމުންދާ ކަމަށް ރިޕޯޓުތަކުން ދައްކައެވެ.
ރިސޯޓު ހުޅުވުމުގެ ރަސްމިއްޔާތުގައި އުތުރު ކޮރެޔާގައި ހުންނަވާ ރަޝިޔާގެ ސަފީރާއި އެމްބަސީގެ މުވައްޒަފުން ބައިވެރިވިއެވެ. އެހެންނަމަވެސް، ޗައިނާގެ ސަރުކާރުގެ މަންދޫބުން މި ރަސްމިއްޔާތުގައި ބައިވެރިނުވި ކަމަށް ފާހަގަކުރެވެއެވެ. މިއީ ޚާއްޞަ ކަމެއް ކަމުގައި ބެލެވެނީ، ކޯވިޑް-19 ގެ ކުރިން އުތުރު ކޮރެޔާއަށް ޒިޔާރަތްކުރާ ފަތުރުވެރިންގެ 90 ޕަސެންޓަކީ ޗައިނާގެ ރައްޔިތުން ކަމަށްވާތީއެވެ.
އިރުމަތީ އޭޝިޔާގެ އެންމެ އެކަހެރި ޤައުމުގެ ގޮތުގައި މަޝްހޫރުވެފައިވާ އުތުރު ކޮރެޔާއަކީ، 1948 ވަނަ އަހަރު ކޮރެޔާ ޕެނިންސުލާ ބައިބައިވުމުން އުފެދުނު ޤައުމެކެވެ. ޚުދުމުޚުތާރު ވެރިކަމެއްގެ ދަށުން ހިންގަމުންދާ މި ޤައުމުގައި، ރައްޔިތުންގެ ދިރިއުޅުމުގެ ގިނަ ކަންތައްތައް ސަރުކާރުގެ ކޮންޓްރޯލުގެ ދަށުގައި އޮވެއެވެ.
ކޯވިޑް-19 ފެތުރުމާ ގުޅިގެން 2020 ވަނަ އަހަރު އުތުރު ކޮރެޔާއިން ބޭރުގެ ފަތުރުވެރިން އެތެރެވުން މަނާކުރިއެވެ. މިހާރު ވެސް މި ޤަވާއިދު ފުރިހަމައަށް ލުއިކޮށްފައެއް ނުވެއެވެ. އެހެންނަމަވެސް، ރަޝިޔާގެ ރައްޔިތުންނަށް 2025 ވަނަ އަހަރުގެ ފެބްރުއަރީ މަހުން ފެށިގެން އުތުރު ކޮރެޔާއަށް ދަތުރުކުރުމުގެ ހުއްދަ ދޭން ފަށައިފައިވެއެވެ.
މި އަހަރުގެ ފެބްރުއަރީ މަހު ބޭރުގެ ފަތުރުވެރިންގެ ކުޑަ ގްރޫޕެއް އުތުރު ކޮރެޔާއަށް ވަނުމުގެ ހުއްދަ ދިނުމަށްފަހު، މާރިޗު މަހު އެ ޓުއަރތައް މެދުކަނޑާލިކަމަށް ޓްރެވަލް އެޖެންސީތަކުން ބުނެއެވެ. އޭޕްރިލް މަހު ބޭރުގެ ދުވުންތެރިން ބައިވެރިވި މެރެތޮނެއް އެ ޤައުމުގައި ބޭއްވިފައިވެއެވެ.
އަލަށް ހުޅުވި މި ރިސޯޓު އުތުރު ކޮރެޔާގެ ރައްޔިތުންނަށް ޖުލައި 1 ގައި ހުޅުވައިލާނެ ކަމަށް އިޢުލާންކޮށްފައިވީ ނަމަވެސް، ބޭރުގެ ފަތުރުވެރިންނަށް ހުޅުވައިލާނެ ތާރީޚެއް އަދި ކަނޑައެޅިފައެއް ނުވެއެވެ. އުތުރު ކޮރެޔާގެ ފަތުރުވެރިކަމުގެ ސިނާޢަތު ކުރިއެރުވުމުގެ މި އާ ޗެޕްޓަރު ކިހާ ވަރަކަށް ކާމިޔާބުވާނެކަން ބެލުމަށް ދުނިޔޭގެ ސަމާލުކަން މިހާރު ހުރީ އެ ޤައުމުގެ މައްޗަށެވެ.
ކޮމެންޓު ފޮނުވާ