އެމެރިކާއިން އީރާނުގެ ނިއުކްލިއަރ މަރުކަޒުތަކަށް ދިން ހަމަލާތަކާ ގުޅިގެން އީރާނުގެ ސުޕްރީމް ލީޑަރު އާޔަތުﷲ އަލީ ޚާމަނާއީ އެމެރިކާއަށް ވަރުގަދަ ރައްދެއް ދެއްވައިފިއެވެ. އެ ހަމަލާތަކުގެ ފަހުން ފުރަތަމަ ފަހަރަށް އާންމުކުރެވުނު ވީޑިއޯ މެސެޖެއްގައި ޚާމަނާއީ ވިދާޅުވީ އެމެރިކާގެ ހަމަލާތަކުން އީރާނުގެ ނިއުކްލިއަރ ޕްރޮގްރާމަށް ދަތިވާވަރުގެ ގެއްލުމެއް ނުލިބޭ ކަމަށެވެ. އަދި ޚާމަނާއީ ވިދާޅުވީ އީރާނުން ދުވަހަކުވެސް އެމެރިކާއަށް ބޯ ނިލަބާނެ ކަމަށެވެ.
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވި ފަދައިން އީރާނުގެ ނިއުކްލިއަރ ޕްރޮގްރާމް މުޅިން ނައްތާލެވިއްޖެ ކަމުގެ ދަޢުވާއަކީ ހަގީގަތާ ޚިލާފު ވާހަކައެއް ކަމަށް ޚާމަނާއީ ވިދާޅުވިއެވެ. އަދި ޓްރަމްޕް ވާހަކަދައްކަވަނީ ކަންތައްތައް ހަގީގަތަށްވުރެ ބޮޑުކޮށް ދައްކަވައިގެން ކަމަށް ވެސް އޭނާ ފާހަގަކުރެއްވިއެވެ.
އެމެރިކާއިން މި ފިޔަވަޅު އެޅުއްވީ ހަމައެކަނި ނިއުކްލިއަރ މައްސަލައަކަށް ނުވަތަ ޔޫރޭނިއަމް ފައްކާކުރުމާ ދެކޮޅަށް ނޫން ކަމަށް ވިދާޅުވި ޚާމަނާއީ، އެމެރިކާގެ އަސްލު ބޭނުމަކީ އީރާން ލައްވާ އަމާންދިނުވުން ކަމަށް ވިދާޅުވިއެވެ. ނަމަވެސް "އަމާންދިނުން" މި ލަފުޒަކީ އީރާނުގެ ބަސްކޮށާރުގައި ނެތް އެއްޗެއް ކަމަށް ޚާމަނާއީ ހަރުކަށި ބަހުން ވިދާޅުވިއެވެ.
އީރާނުން އަމާންދިނުމަށް ޓްރަމްޕް ގޮވާލެއްވުމަކީ އެމެރިކާގެ ރައީސްގެ އަނގަޔަށް ބޮޑު ލަފުޒެއް ކަމަށް ވިދާޅުވި ޚާމަނާއީ، އީރާނުން ވަނީ އެމެރިކާގެ މޫނުމަތީގައި ވަރުގަދަ އެތިފަހަރަކުން ޖަހާފައި ކަމަށް ވިދާޅުވިއެވެ. މި ވާހަކަފުޅުން ޚާމަނާއީ އިޝާރާތްކުރެއްވި ކަމަށް ބެލެވެނީ ގަތަރުގައި ހުރި އެމެރިކާގެ އަސްކަރީ މަރުކަޒަށް އީރާނުން ކުރިން ދިން ހަމަލާތަކަށެވެ.
އީރާނުގެ 90 މިލިއަން ރައްޔިތުން މި ދުވަސްވަރު ދައްކުވައިދެއްވި އެއްބައިވަންތަކަމަށް ޝުކުރު އަދާކުރެއްވި ޚާމަނާއީ، އިޒުރޭލުގެ މައްޗަށް އީރާނުން ކާމިޔާބު ހޯދައިފި ކަމަށް ތަކުރާރުކޮށް ވިދާޅުވިއެވެ. އެމެރިކާގެ ހަމަލާތަކުން ނުކުތް ނަތީޖާ ވަރަށް ކުޑަ ކަމަށާއި، އީރާނުގެ ނިއުކްލިއަރ ޕްރޮގްރާމަށް ފާހަގަކޮށްލެވޭ ފަދަ ގެއްލުމެއް ނުވާ ކަމަށް ވެސް އޭނާ ވިދާޅުވިއެވެ.
ކޮމެންޓު ފޮނުވާ