ރާއްޖޭގައި ޑައިބެޓީސް އާއި މެޓަބޮލިކް ޑިސްއޯޑާސްތަކަށް ޚާއްޞަކޮށްގެން ޤާއިމުކުރެވުނު ފުރަތަމަ ސެންޓަރު މިއަދު ހުޅުވިއްޖެއެވެ. ސިއްޙީ ވުޒާރާގެ ވަޒީރު އަބްދުﷲ ނާޒިމް އިބްރާހީމް ހުޅުއްވައިދެއްވި މި ސެންޓަރަކީ، ރާއްޖޭގައި މިފަދަ ބަލިތަކަށް ޚާއްޞަކޮށްގެން ޤާއިމުކުރެވުނު ފުރަތަމަ މަރުކަޒެވެ.
މި ސެންޓަރުގައި ހައި ބްލަޑް ޕްރެޝަރ، ބަރުދަން ބޮޑުވުން، ހަކުރުބަލި، ޕީސީއޯއެސް އަދި ކޮލެސްޓްރޯލް މައްސަލަތައް ފަދަ މެޓަބޮލިކް ބަލިތަކަށް ފަރުވާ ދިނުމަށް ޒަމާނީ ލެބޯޓްރީ ވަސީލަތްތަކާއި ޑައިގްނޯސްޓިކް އާލާތްތައް ޤާއިމުކުރެވިފައިވެއެވެ. މި ވަސީލަތްތަކުގެ ސަބަބުން ބަލިމީހުންނަށް އެންމެ ފެންވަރު ރަނގަޅު ޚިދުމަތް ފޯރުކޮށްދެވޭނެއެވެ.
ސެންޓަރު ހުޅުވުމުގެ ރަސްމިއްޔާތުގައި ޒަމާނީ ޓެކްނޮލޮޖީގެ އެހީގައި ތައްޔާރުކުރެވިފައިވާ ކޮންޓިނިއުއަސް ގްލޫކޯޒް މޮނިޓަރިންގ ސިސްޓަމް (ސީޖީއެމްއެސް) ތަޢާރަފުކުރެވުނެވެ. މި ސިސްޓަމަކީ ލޭގައި ހަކުރު ހުންނަ މިންވަރު ވަގުތުން ވަގުތަށް ބަލައި، ބަލިމީހުންނަށް ދޭންޖެހޭ ބޭސް އާއި މިންވަރު ކަނޑައެޅުމުގައި ޑޮކްޓަރުންނަށް މުހިންމު މަޢުލޫމާތު ފޯރުކޮށްދޭ އެންމެ ފަހުގެ އާލާތެކެވެ.
ރަސްމިއްޔާތުގައި އެންޑޮކްރިނޮލޮޖިސްޓް ޑރ. މުޙައްމަދު ވިޝާމް ލިޔުއްވާފައިވާ ޑައިބެޓީސް އާއި މެޓަބޮލިކް ޑިސްއޯޑާސް ބަލިމީހުންނަށް ތަޢުލީމު ދިނުމުގެ ގައިޑެއް ވެސް ތަޢާރަފުކުރެވުނެވެ. މި ގައިޑަކީ ރާއްޖޭގައި ގިނައިން ފެންނަ މެޓަބޮލިކް ބަލިތަކާ ބެހޭގޮތުން އާންމުންނަށް މަޢުލޫމާތު ދިނުމަށްޓަކައި ތައްޔާރުކޮށްފައިވާ ދެވަނަ ފޮތެވެ. މި ފޮތުން ބަލިމީހުންނަށް އަމިއްލައަށް ތަޢުލީމު ހާސިލުކޮށް، ބަލި ކޮންޓްރޯލުކުރުމަށް މަގުފަހިވެގެންދާނެއެވެ.
ކޮމެންޓު ފޮނުވާ