އިރާނުގެ ސުޕްރީމް ލީޑަރު އަލީ ޚާމެނެއީ އަވަހާރަ ކޮށްލެވިއްޖެނަމަ ހަނގުރާމަ "ނިމުމަކަށް" އަންނާނެ: ނެތަންޔާހޫ

އިރާނުގެ ސުޕްރީމް ލީޑަރު އަލީ ޚާމެނެއީ ކޮށްލެވިއްޖެނަމަ ޓެހްރާނާއި ޓެލް އަވީވްގެ ދެމެދުގައި ދެމިގެންދާ ހަނގުރާމަ "ނިމުމަކަށް" އަންނާނެކަމަށް އިސްރާއީލުގެ ޕްރައިމް މިނިސްޓަރު ބެންޖަމިން ނެތަންޔާހޫ ހޯމަ ދުވަހު ވިދާޅުވެއްޖެއެވެ. ސަރަހައްދީ ގޮތުން ވަރަށް ބޮޑު ނުތަނަވަސްކަމެއް އުފެދިފައިވާ މި ދަނޑިވަޅުގައި  އެފަދަ ފިޔަވަޅެއް އެޅުމުގެ ފުރުސަތު އެމެރިކާއިން ނަތަންޔާހޫއަށް ދޫކޮށްލާފައި ނުވާކަމަށް މީޑިއާ ރިޕޯޓްތައް ބުނެއެވެ.

"މިކަމުން ހަނގުރާމަ ބޮޑުވާނީއެއް ނޫން، ހަނގުރާމަ ނިމޭނެ،" ނެތަންޔާހޫ އޭބީސީ ނިއުސްއަށް ދިން އިންޓަވިއުއެއްގައި ވިދާޅުވިއެވެ. "’އަބަދަށް ދެމިގެންދާ ހަނގުރާމަ' އަކީ އިރާން ބޭނުންވާ ކަމެއް، އަދި އެމީހުން އަޅުގަނޑުމެން ގެންދަނީ ނިއުކްލިއަރ ހަނގުރާމައެއްގެ ކައިރިއަށް. ހަގީގަތުގައި އިސްރާއީލް ކުރަމުންދަނީ މިކަން ހުއްޓުވައި، މި އުދުވާން ނިމުމަކަށް ގެނައުން، އަދި އަޅުގަނޑުމެންނަށް މިކަން ކުރެވޭނީ ނުބައިކަމުގެ ބާރުތަކާ ދެކޮޅަށް ތެދުވެގެން."

ކުރިން ލިބުނު ރިޕޯޓްތަކުން އެނގޭ ގޮތުގައި ޚާމެނެއީ އަވަހާރަކޮށްލުމަށް އިސްރާއީލުން ރޭވި ޕްލޭނެއް އެމެރިކާގެ ރައީސް ޑޮނަލްޑް ޓްރަމްޕް ވީޓޯކޮށްފައިވެއެވެ.

އިސްރާއީލުން އިރާނުގެ ލީޑަރު ޓާގެޓްކުރާނެތޯ ސުވާލުކުރުމުން ނެތަންޔާހޫ ވިދާޅުވީ އިސްރާއީލް "ކުރަންޖެހޭ ކަންތައްތައް ކުރަމުންދާ" ކަމަށެވެ.

"އަޅުގަނޑު ތަފްސީލަށް ނުދާނަން، އެކަމަކު އަޅުގަނޑުމެން އެމީހުންގެ އެންމެ މަތީ ފަންތީގެ ނިއުކްލިއަރ ސައިންޓިސްޓުންނަށް ޓާގެޓްކޮށްފިން،" ނެތަންޔާހޫ ބުންޏެވެ.

ހޯމަ ދުވަހުގެ ކުރިން އެމެރިކާގެ ސްޓޭޓް ޑިޕާޓްމަންޓުން އިސްރާއީލާއި، އިޒްރޭލުން ހިފާފައިވާ ވެސްޓް ބޭންކާއި، ޣައްޒާއަށް ދަތުރުކުރުމާ ގުޅޭ އެޑްވައިޒަރީ އަޕްޑޭޓްކޮށް، ސެކިއުރިޓީ ރިސްކް މަތިވެފައިވާތީ އެމެރިކާގެ ރައްޔިތުން އެ ސަރަހައްދަށް ދަތުރު ނުކުރުމަށް އިންޒާރުދީފައިވެއެވެ.

ހުކުރު ދުވަހުން ފެށިގެން ދެގައުމުގެ ދެމެދުގައި ހިނގަމުންދާ ހަނގުރާމައަކީ އިސްރާއީލުން އިރާނުގެ އެކި ސަރަހައްދުތަކުގައި ހުރި މިލިޓަރީ އަދި ނިއުކްލިއަރ ތަންތަނަށް ވައިގެ މަގުންނާއި ޑްރޯން ހަމަލާތައް ދިނުމުން، ޓެހްރާން ބަދަލު ހިފުމުގެ ހަމަލާތައް ފެށުމުން ހިނގަމުންދާ ހަނގުރާމައެކެއެވެ.

އިސްރާއީލުގެ އޮފިޝަލުން ބުނި ގޮތުގައި ހުކުރު ދުވަހުން ފެށިގެން އިރާނުގެ މިސައިލް ހަމަލާތަކުގައި މަދުވެގެން 24 މީހުން މަރުވެ އެތައް ސަތޭކަ މީހުން ޒަޚަމްވެފައިވެއެވެ.

އިރާނުން ބުނި ގޮތުގައި އިސްރާއީލުގެ ހަމަލާތަކުގައި މަދުވެގެން 224 މީހުން މަރުވެ 1,000 އަށްވުރެ ގިނަ މީހުން ޒަޚަމްވެފައިވެއެވެ.