އިސްރާއީލުގެ ސިފައިން އިއްޔެ އިރާނަށް ދޭފެށި ހަމަލާތަކުގައި މަރުވި މީހުންގެ އަދަދު 78 އަށް އަރައިފިކަމަށް އިރާނުން އދ އަށް ކަނޑައަޅާފައިވާ ސަފީރު އާމިރު އިރަވާނީ ހާމަކުރައްވައިފިއެވެ.
އދ ގެ ސަލާމަތީ މަޖިލީހުގެ ކުއްލި ޖަލްސާއެއްގައި ވާހަކަދައްކަވަމުން އާމިރު ފާހަގަކުރެއްވީ، މި ހަމަލާގައި އިރާނުގެ ސިފައިންގެ އިސް އޮފިޝަލުން ހިމެނޭގޮތުން 78 މީހުން ޝަހީދުވެ، 320 އަށްވުރެ ގިނަ މީހުންނަށް އެކި ދަރަޖައިގެ އަނިޔާތައް ލިބިފައިވާކަމަށެވެ. މި ހަމަލާގެ ޝިކާރައަކަށްވީ މީހުންގެ ތެރޭގައި އާންމު ރައްޔިތުންނާއި، އަންހެނުންނާއި ކުޑަކުދިންވެސް ހިމެނޭކަމަށް އޭނާ ވިދާޅުވިއެވެ.
އިސްރާއީލުގެ ޖެޓްތަކުން މި ދިން ހަމަލާތައް އަމާޒުކޮށްފައިވަނީ އިރާނުގެ ނިއުކްލިއަރ ފެސިލިޓީތަކާއި މިލިޓަރީ ބޭސްތަކަށް ކަމަށް ރިޕޯޓްތައް ބުނެއެވެ. މި ހަމަލާތަކުގެ ސަބަބުން އިރާނަށް ނުހަނު ބޮޑު ގެއްލުންތަކެއް ލިބި، އެ ޤައުމުގެ ޑިފެންސް އިންފްރާސްޓްރަކްޗަރ އަށް ބޮޑު އަސަރެއް ކޮށްފައިވާކަމަށް މަޢުލޫމާތު ލިބެއެވެ.
އިސްރާއީލާއި އިރާނާ ދެމެދުގެ ފިތުނަ މިހާ ގޯސްވެފައިވާ ދަނޑިވަޅެއްގައި، އިރާނުން މިހާރު ދަނީ އިސްރާއީލަށް ރައްދު ހަމަލާތައް ދެމުންނެވެ. މި ދެ ޤައުމުގެ ދެމެދުގެ ހާލަތާމެދު ބައިނަލްއަޤްވާމީ މުޖުތަމަޢުން ކަންބޮޑުވުން ފާޅުކުރަމުންދާއިރު، މެދުއިރުމަތީގެ ސުލްޙަމަސަލަސްކަމަށް މިކަމުން ކުރާނެ އަސަރާމެދު ފަރާތްތަކުން އިންޒާރުދީފައިވެއެވެ.
ކޮމެންޓު ފޮނުވާ