ށ. ފުނަދޫ އެއާޕޯޓުގައި ދިމާވި ޓެކްނިކަލް މައްސަލައަކާ ގުޅިގެން އެ އެއާޕޯޓަށް ކުރާ ދަތުރުތައް ވަގުތީ ގޮތުން މެދުކަނޑާލަން ޖެހިއްޖެއެވެ. ލިބިފައިވާ މައުލޫމާތުތަކުން އެނގޭ ގޮތުގައި މި މައްސަލަ ދިމާވެފައިވަނީ އެއާޕޯޓުގައި ބޭނުންކުރާ ފަޔާ ލޮރީގައެވެ.
މޯލްޑިވިއަން އެއާލައިންސްއިން މިއަދު ނެރުނު އިއުލާނެއްގައި ވިދާޅުވީ، އެއާޕޯޓުގައި ދިމާވި ޓެކްނިކަލް މައްސަލައެއްގެ ސަބަބުން ފުނަދުއަށް މިއަދު ކުރުމަށް ހަމަޖެހިފައިވާ ދަތުރުތައް ކުރެވެން ނެތް ކަމަށެވެ. މި ހާލަތުގައި ފުނަދުއަށް ދިއުމަށް މިއަދަށް ޓިކެޓް ގަނެފައި ތިބި ފަސިންޖަރުންނަށް އެހެން އިންތިޒާމެއް ހަމަޖައްސައިދިނުމަށް އެ ކުންފުނިން މަސައްކަތް ކުރަމުންދާ ކަމަށް މޯލްޑިވިއަންއިން ބުނެއެވެ.
އެ ކުންފުނިން ވިދާޅުވީ، ދަތުރު ކުރުމަށް ޓިކެޓް ގަނެފައި ތިބި ފަސިންޖަރުންނާ ވަކިވަކިން ގުޅައިގެން، އެ މީހުންނަށް އެންމެ އެކަށީގެންވާ ހައްލެއް ހޯދައިދިނުމަށް މަސައްކަތް ކުރާނެ ކަމަށެވެ. މިކަމާ ގުޅިގެން ފަސިންޖަރުންނަށް ދިމާވެފައިވާ އުނދަގޫތަކަށް މޯލްޑިވިއަންއިން ވަނީ މަޢާފަށް އެދިފައެވެ. އަދި އިތުރު މައުލޫމާތު ނުވަތަ އެހީތެރިކަން ބޭނުންވާ ފަސިންޖަރުން 1671 ނަންބަރަށް ގުޅުމަށް އެ ކުންފުނިން އެދިފައިވެއެވެ.
މޯލްޑިވިއަން އެއާލައިންސްއިން ފުނަދުއަށް ކުރަނީ ހަފުތާއަކު ތިން ދުވަހުގެ ދަތުރުތަކެވެ. މި މައްސަލަ ހައްލުވެ، ދަތުރުތައް އަލުން ފެށޭނެ ވަގުތާ ބެހޭ ގޮތުން އަދި ރަސްމީ މައުލޫމާތެއް ހާމަކޮށްފައެއް ނުވެއެވެ.
ކޮމެންޓު ފޮނުވާ