މާލެ ސިޓީ ކައުންސިލުން މި އަހަރުގެ ޢީދުލްއަޟްޙާގެ ހަވީރު، ޢީދު ފާހަގަކުރުމުގެ ގޮތުން ގްރޭޓަރ މާލެ ސަރަހައްދުގެ (ޖީއެމްއާރު) ހުރިހާ އާންމު މަގުތަކެއް އެއްގަމު އުޅަނދު ދުއްވުން މަނާ ސަރަހައްދުތަކެއް ކަމަށް އިޢުލާނު ކޮށްފިއެވެ.
ޢީދުލްއަޟްޙާގެ ހަވީރު މާލޭސަރަހައްދުގެ މަގުތަކުގައި އެއްގަމު އުޅަނދު ދުއްވުން މަނާ ކޮށްފައިވާ އިރު، މާލެ ސަރަހައްދުގެ މަގުތަކުގައި އެއްގަމު އުޅަނދު ދުއްވުން މަނާ ކޮށްފައިވަނީ ޢީދު ދުވަހުގެ ހަވީރު 4:00 އިން 6:00 އަށެވެ.
ސިޓީ ކައުންސިލުން ބުދަ ދުވަހު ބުނެފައިވަނީ، އެއްގަމު އުޅަނދު ދުއްވުން މަނާ ގަޑިތަކުގައި ކުއްލި ޙާލަތްތަކުގައި ދަތުރުކުރާ އުޅަނދުތަކަށް ޚާއްޞަ ސްޓިކަރ ދޫކުރާނީ ކައުންސިލްގެ ޕަބްލިކް ސަރވިސް ސެކްޝަނުން ޖޫން 6 ވަނަ ދުވަހު، ހެނދުނު 08:30 އިން 10:30 އަށާއި، މެންދުރުފަހު 2:00 އިން 3:45 އަށް ކަމަށެވެ.
މިއާއެކު، ޢީދު ދުވަހުގެ ހަވީރު 4:00 އިން 6:00 އަށް އިންޖީނުލީ އަދި ބެޓަރީން ދުއްވާ އުޅަނދުތައް ދުއްވުން މަނާ ކަމަށް އާންމުކޮށް އިޢުލާނު ކޮށްފައިވާ އިރު، މި އިޢުލާނާ ޚިލާފުވާ ފަރާތްތަކާ މެދު ޤާނޫނީ ފިޔަވަޅު އަޅާނެ ކަމަށް އެ އިދާރާއިން ބުނެފައިވެއެވެ.
ޙައްޖުގެ ދުވަހަކީ ޖޫން 5 ވަނަ ދުވަހެވެ. ޢީދު ބަންދުތައް ފެށެނީ ހުކުރު ދުވަހު، ޖޫން 6 ގައެވެ.
މި އަހަރުގެ ޢީދުލްއަޟްޙާ ޤައުމީ ފެންވަރުގައި ފާހަގަކުރުމަށް ސަރުކާރުން ނިންމާފައިވާ ތިން ރަށަކީ ލ. އަތޮޅު ގަން، ކ. އަތޮޅު ގުރައިދޫ، އަދި ހއ. އަތޮޅު ކެލާ އެވެ.
ރައީސް މުޢިއްޒު ވެރިކަމަށް ވަޑައިގަތީއްސުރެ، ސަރުކާރުން ވަނީ މިހާތަނަށް ފާހަގަކުރެވުނު ކޮންމެ ޢީދެއްގައި މާލޭގައާއި އެކި ރަށްރަށުގައި ޢީދު ފާހަގަކުރުމުގެ ޙަރަކާތްތައް ސީދާ ރާވައި އެހީތެރިކަން ފޯރުކޮށްދީފައެވެ.
ކޮމެންޓު ފޮނުވާ