މިސްރުގެ އަލްއަޒްހަރު ޔުނިވަރސިޓީގައި ކިޔެވުމުގެ 22 ސްކޮލަރޝިޕް ފުރުސަތެއް ދިވެހި ދަރިވަރުންނަށް ހުޅުވާލައިފިއެވެ. ހަޔާ އެޑިޔުކޭޝަން މިނިސްޓްރީން ހުޅުވާލި މި ފުރުސަތުތަކުގެ ތެރޭގައި ބެޗެލާސް އޮފް ޝަރީއާ ދާއިރާއިން 5 ފުރުސަތާއި، ބެޗެލާސް އޮފް ސައިންޓިފިކް/ތިއަރެޓިކަލް ދާއިރާތަކުން 17 ފުރުސަތު ހިމެނެއެވެ.
މި ސްކޮލަރޝިޕްތަކަށް އެދި ހުށަހެޅުމުގެ މުއްދަތަކީ އަންނަ މަހުގެ 4 ވަނަ ދުވަހުގެ މެންދުރު 12:00 އާ ހަމައަށެވެ. އެޕްލިކޭޝަން ހުށަހަޅަންޖެހޭނީ "މައި އެޑިއު" އޮންލައިން ޕޯޓަލް މެދުވެރިކޮށެވެ.
ސްކޮލަރޝިޕަށް އެދޭ ފަރާތްތަކުން ފުރިހަމަކުރަންޖެހޭ ޝަރުތުތަކުގެ ތެރޭގައި ޝަހާދާ ސާނަވިއްޔާ އިމްތިހާނު ފާސްވެފައިވުން ހިމެނެއެވެ. މީގެ އިތުރުން ޔުނިވަރސިޓީން ކަނޑައަޅާފައިވާ އިތުރު ޝަރުތުތައް ފުރިހަމަވާންޖެހޭނެއެވެ. މި ޝަރުތުތައް ބަޔާންކޮށްދޭ އިންފޮމޭޝަން ޝީޓް ހޯދޭނީ އެޕްލިކޭޝަން ޕޯޓަލުންނެވެ.
ސަރުކާރުގެ ސްޓޫޑެންޓް ލޯނެއް ނަގާފައިވާ ފަރާތްތަކުން މި ފުރުސަތަށް ކުރިމަތިލާނަމަ، ލޯން ޑީފޯލްޓެއް ނެތި ގަވާއިދުން އަދާކުރަމުންދާންޖެހޭނެއެވެ. ހަމައެހެންމެ، މިހާރު ކިޔަވަމުންދާ ނުވަތަ ފުރިހަމަކޮށްފައިވާ ކޯހަށްވުރެ މަތީ ފެންވަރުގެ ކޯހަކަށް ކުރިމަތިލާންޖެހޭނެއެވެ.
ދައުލަތުގެ ހަރަދުގައި މިހާރު އެއް ފެންވަރެއްގެ ކޯހެއް ކިޔަވަމުންދާ ދަރިވަރުންނަށް މި ފުރުސަތު ނުލިބޭނެކަން މިނިސްޓްރީން ސާފުކޮށްދީފައިވެއެވެ. ސްޓޫޑެންޓް ލޯނު ސްކީމަށް ހޮވިފައިވާ ދަރިވަރުން ލޯނު އެގްރީމެންޓްގައި ސޮއިނުކޮށްފި ނަމަ މި ސްކޮލަރޝިޕަށް އެދި ހުށަހެޅިދާނެއެވެ. ނަމަވެސް ސްކޮލަރޝިޕް ލިބިއްޖެނަމަ ލޯނުގެ ފުރުސަތު ދޫކޮށްލަންޖެހޭނެއެވެ.
އެހެން ސްކޮލަރޝިޕަކަށް ނޮމިނޭޓްވެފައިވާ ދަރިވަރުންނަށް މި ފުރުސަތަށް ނޮމިނޭޓެއް ނުކުރެވޭނެކަން ވެސް އެޑިޔުކޭޝަން މިނިސްޓްރީން ހާމަކޮށްފައިވެއެވެ. އަލްއަޒްހަރު ޔުނިވަރސިޓީއަކީ އިސްލާމީ ތައުލީމާއި ސައިންސް ދާއިރާތަކުން ދުނިޔޭގެ އެންމެ ގަދީމީ އަދި މަޝްހޫރު ޔުނިވަރސިޓީތަކުގެ ތެރޭގައި ހިމެނޭ މުއައްސަސާއެކެވެ.
ކޮމެންޓު ފޮނުވާ