ތ. ވޭމަންޑޫ ކައުންސިލް އިންފޮމޭޝަން ކޮމިޝަނަރުގެ އޮފީހުން 350 ރުފިޔާއިން ޖޫރިމަނާ ކޮށްފިއެވެ. މިއީ އައިކޮމްއިން ބޭއްވި ދެ ބައްދަލުވުމަކަށް އެ ކައުންސިލުން ހާޒިރުނުވުމުންނެވެ.
މި މައްސަލަ ދިމާވީ މައުލޫމާތު ހޯދައި ލިބިގަތުމުގެ ގާނޫނުގެ ދަށުން ވޭމަންޑޫ ކައުންސިލަށް ހުށަހެޅި މައުލޫމާތު ހޯދުމުގެ ހުށަހެޅުމަކާ ގުޅިގެންނެވެ. ކައުންސިލްގެ އިންފޮމޭޝަން އޮފިސަރު ދިން ޖަވާބާމެދު ހިތްހަމަނުޖެހިގެން އައިކޮމަށް ޝަކުވާއެއް ހުށަހެޅިފައިވެއެވެ.
ގާނޫނުގައި ބުނާ ގޮތުން މިކަހަލަ ޝަކުވާތަކާއި އިލްތިމާސްތައް ބަލަންޖެހެނީ ހުޅުވައިލެވިފައިވާ ބައްދަލުވުމެއްގައެވެ. އެގޮތުން އެޕްރިލް 28 ގައި އައިކޮމްއިން ބައްދަލުވުމެއް ތާވަލުކުރިއެވެ. އެކަމަކު ވޭމަންޑޫ ކައުންސިލުން ބައިވެރިނުވުމުން އެ ބައްދަލުވުން ކެންސަލްކުރަން ޖެހުނެވެ.
ދެވަނަ ފުރުޞަތެއްގެ ގޮތުން މި މަހުގެ 1 ވަނަ ދުވަހު އައިކޮމްއިން އަނެއްކާވެސް ބައްދަލުވުމެއް ހަމަޖެއްސިއެވެ. ނަމަވެސް މި ބައްދަލުވުމަށްވެސް ވޭމަންޑޫ ކައުންސިލުން ހާޒިރެއް ނުވިއެވެ. އެހެންކަމުން ކައުންސިލްގެ ޣައިރު ހާޒިރުގައި ބައްދަލުވުން ކުރިއަށް ގެންދެވުނެވެ.
ގާނޫނުގައި ސާފުކޮށް ބަޔާންކޮށްފައިވަނީ އައިކޮމްއިން އަންގާ ބައްދަލުވުންތަކަށް ހާޒިރުވެވެން ނެތްނަމަ، ބައްދަލުވުން ފެށުމުގެ މަދުވެގެން އެއްގަޑިއިރު ކުރިން އެކަން އަންގަންޖެހޭނެ ކަމަށެވެ. އެހެންނަމަވެސް ވޭމަންޑޫ ކައުންސިލުން މިފަދަ އެންގުމެއް ދީފައެއް ނުވެއެވެ.
އައިކޮމްއިން ފާހަގަކުރި ގޮތުގައި ވޭމަންޑޫ ކައުންސިލުގެ މި ޢަމަލަކީ އިންފޮމޭޝަން ކޮމިޝަނަރުގެ ވާޖިބުތައް އަދާކުރުމަށް ހުރަސްއެޅުމެވެ. މިކަމަށްޓަކައި ގާނޫނުގައިވާ ގޮތުގެ މަތިން ވޭމަންޑޫ ކައުންސިލް 350 ރުފިޔާއިން ޖޫރިމަނާ ކުރުމަށް އައިކޮމްއިން ނިންމާފައިވެއެވެ.
ކޮމެންޓު ފޮނުވާ