ތެލަސީމިއާ ބަލީގެ ކަންކަން ރަނގަޅުކުރުމުގެ މަސައްކަތް ފަހުގެ ތާރީޚެއްގައި ސަރުކާރުގެ ސިޔާސަތުގެ ތެރޭގައި ހިމަނައިގެން ކުރިއަށް ގެންދަވަނީ މިހާރުގެ ސަރުކާރުގައި ކަމަށް ސިއްޙީ ވަޒީރު ޢަބްދުﷲ ނާޠިމް އިބްރާހިމް ވިދާޅުވެއްޖެއެވެ.
އޮރެންޖު ހިޔާއަށް މޯލްޑިވްސް ބްލަޑް ސަރވިސްގެ ޚިދުމަތްތަކާއި ތެލަސީމިއާ ސެންޓަރު ބަދަލުކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ސިއްޙީ ވަޒީރު ވިދާޅުވީ، ރާއްޖޭގައި ތެލަސީމިއާ ބަލި ފެނި ފަށައިގަތް ދުވަހުން ފެށިގެން މި ބަލީގައި ފަރުވާ ހޯދުމުގައި ރައްޔިތުން ދަތިތަކާ ކުރިމަތިލާންޖެހިފައިވާ ކަމަށެވެ. ނަމަވެސް މި ދަތިތަކުން އަރައިގަތުމަށް އެކި ސަރުކާރުތަކުން އެކި ސިޔާސަތުތައް ތަންފީޒުކޮށް ކާމިޔާބުތައް ހޯދާފައިވާ ކަމަށް ވަޒީރު ފާހަގަކުރެއްވިއެވެ.
މޯލްޑިވްސް ބްލަޑް ސަރވިސް ފުޅާކުރުމަށް ކުރީގެ ސަރުކާރުތަކުންވެސް މަސައްކަތްތައް ކޮށްފައިވީނަމަވެސް، ސަރުކާރުގެ މައިގަނޑު ސިޔާސަތުގައި މިކަން ހިމަނުއްވައި، ވެރިޔަކު އަމިއްލަފުޅަށް އިރުޝާދުދެއްވައި މުއައްސަސާތައް ޒިންމާދާރުކުރުވަމުން ގެންދަވަނީ ރައީސް ޑރ. މުޙައްމަދު މުޢިއްޒުގެ ސަރުކާރުގައި ކަމަށް ވަޒީރު ވިދާޅުވިއެވެ. މިއީ މި ޚިދުމަތް ފުޅާކުރުމުގައި ލިބޭ ވަރަށް ބޮޑު ކާމިޔާބީއެއް ކަމަށް ވަޒީރު ދެކިވަޑައިގަންނަވާ ކަމަށްވެސް ވިދާޅުވިއެވެ.
"ސަރުކާރުގެ މެނިފެސްޓޯގައި ހިމަނައިގެން މި ބަލީގައި ޝިފާ ހޯދުމާއި މިކަމުގެ ކަންކަން ރަނގަޅުކުރުމަށް ކުރަންޖެހޭ މަސައްކަތްތައް ތަރުތީބުކޮށް ކުރިއަށް ގެންދެވިފައިވަނީ ފަހުގެ ތާރީޚެއްގައި ހަމައެކަނި މިހާރުގެ އެޑްމިނިސްޓްރޭޝަންގައި،" ވަޒީރު ވިދާޅުވިއެވެ.
ތެލަސީމިއާ ފަރުވާގެ ދާއިރާގައި ކުރަންޖެހޭ މަސައްކަތްތައް އަދިވެސް ގިނަކަން ފާހަގަކުރައްވަމުން ވަޒީރު ވިދާޅުވީ، މިހާތަނަށް މި ދާއިރާގައި ގިނަ ކާމިޔާބުތަކެއް ހޯދިފައިވާ ކަމަށެވެ.
30 އަހަރު ވަންދެން މޯލްޑިވްސް ބްލަޑް ސަރވިސް ހިންގި އިމާރާތުގައި ޚިދުމަތް ދިނުމުގައި ދިމާވި ދަތިތައް ޙައްލުކުރުމަށްޓަކައި، ރައީސުލްޖުމްހޫރިއްޔާގެ ޚާއްޞަ މަސައްކަތެއްގެ ދަށުން ދިވެހި ސިފައިންގެ އެހީގައި އޮރެންޖު ހިޔާއަށް މި ޚިދުމަތްތައް ބަދަލުކުރެވިފައިވާ ކަމަށް ވަޒީރު ވިދާޅުވިއެވެ. މި މަސައްކަތުގައި ބައިވެރިވި ސިފައިންނާއި، ސަރުކާރުގެ މުއައްސަސާތަކާއި، މޯލްޑިވްސް ބްލަޑް ސަރވިސްގެ މުވައްޒަފުންނާއި، ތެލަސީމިއާ އާއިލާތަކަށް ސިއްޙީ ވަޒީރު ޝުކުރު އަދާކުރެއްވިއެވެ.
ކޮމެންޓު ފޮނުވާ