ޣައްޒާގެ ސިއްހީ ޚިދުމަތްތަކަށާއި ޑޮކްޓަރުންނަށް ހުއްޓުމެއްނެތި ދެމުންދާ ހަމަލާތައް ވަގުތުން ހުއްޓާލުމަށް މިނިސްޓަރު އަބްދުﷲ ނާޒިމް ގޮވާލަވައިފި އެވެ. ނާޒިމް މިކަމަށް ގޮވާލެއްވީ ޖެނީވާގައި ކުރިއަށްދާ 78 ވަނަ ޢާލަމީ ސިއްހަތު ޢާން ޖަލްސާގައި ވާހަކަ ދައްކަވމުންނެވެ.
މިހާރު ކުރިއަށްދާ 78 ވަނަ ވޯލްޑް ހެލްތު އެސެމްބްލީގައި މިނިސްޓަރު ނާޒިމް ވިދާޅުވީ ޣައްޒާގެ ރައްޔިތުންނަށް ބައިނަލްއަގްވާމީ ގާނޫނުތަކުން ލިބިދޭ ހިމާޔަތާއި ރައްކާތެރިކަން ކަށަވަރުވަމުން ނުދާކަމަށެވެ.
އެގޮތުން ޣައްޒާގެ ސިއްހީ ނިޒާމު ސުންނާފަތިކޮށްލައި، ސިއްހީ ފަރުވާދޭ ތަންތަނަށާއި، ސިއްހީ އެހީތެރިންނަށް އަމާޒުކޮށްދެމުންދާ ހަމަލާތަކާއި, އިންސާނީ އެހީ ފޯރުކޮށްދިނުމަށް އަޅަމުންދާ ހުރަސްތަކާމެދު މިނިސްޓަރު ކަންބޮޑުވުން ފާޅުކުރެއްވި. އަދި މި ހަމަލާތަކާހެދި، ދިރިހުރުމަށް ބޭނުންވާ އެންމެ އަސާސީ ހައްގުތައް ވެސް ޣައްޒާގެ ރައްޔިތުންނަށް ގެއްލިފައި ވާކަމުގައި މިނިސްޓަރު ފާހަގަކުރެއްވި އެވެ.
އިސްރާއީލުން ޣައްޒާގެ ނަސްލު ނައްތާލުމަށް ދެމުންދާ ހަމަލާތައް ކުށްވެރިކޮށް، އިންސާނީ އެހީ ފޯރުކޮށްދެވޭނެ މަގު ފަހިކޮށްދިނުމަށާއި، ކާބޯތަކެއްޗާއި ތެލާއި މެޑިކަލް ސަޕްލައި އެތެރެކުރެވޭނެ އިންތިޒާމު ވަގުތުން ހަމަޖެއްސުމަށް ވެސް މިނިސްޓަރު ގޮވާލެއްވި އެވެ.
މީގެއިތުރުން، ޣައްޒާއަށް ދެމުންދާ ހަމަލާތައް ހުއްޓުވުމަށް އަވަސް ފިޔަވަޅުތަކެއް އެޅުމަށް ބައިނަލްއަގްވާމީ ޖަމިއްޔާތަކާއި އދ.ގެ މެމްބަރު ގައުމުތަކަށް މިނިސްޓަރު ގޮވާލައްވާފައިވެ އެވެ.
މިނިސްޓަރު ނާޒިމް އިތުރަށް ވިދާޅުވީ ކޮންމެ ގައުމަކަށް އަދި ކޮންމެ ނަސްލަކަށް ނިސްބަތްވީނަމަވެސް އިންސާނީ ހައްގުތައް ކަށަވަރުވާންޖެހޭ ކަމަށެވެ. އަދި ރާއްޖެއިން މި މައްސަލައިގައި ސާބިތުކަމާއެކު ކުރެވެން އޮތް ހުރިހާކަމެއް ކުރުމުގައި ދެމި ތިބޭނެ ކަމަށާއި، ދިވެހީން އަބަދުވެސް ފަލަސްތަނާއެކުގައި ތިބޭނެ ކަމަށް މިނިސްޓަރު ވަނީ ވިދާޅުވެފަ އެވެ.
ކޮމެންޓު ފޮނުވާ