ރާއްޖޭގެ އެކި ކަންކޮޅުތަކަށް އައިޑީކާޑު ޕްރިންޓްކުރުމުގެ ޚިދުމަތް ފުޅާކުރުމުގެ މަސައްކަތުގެ ތެރެއިން ބ. އަތޮޅުގެ ދަރަވަންދޫ އަދި އޭދަފުށީގައި މިހާރު އައިޑީކާޑު ޕްރިންޓްކުރުމުގެ ޚިދުމަތް ފަށައިފިއެވެ.
ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރް) އިން އިއްޔެ ދޫކުރި ނޫސްބަޔާނެއްގައި ބުނެފައިވަނީ މި ޚިދުމަތް ބ. އަތޮޅުގައި ޤާއިމްކުރެވުމާއެކު، އެ އަތޮޅުގެ ރައްޔިތުންނަށް މާލެއަށް ނައިސް އަމިއްލަ ރަށުގައި ތިބެގެން އައިޑީކާޑު ހެދުމުގެ ފުރުޞަތު ލިބިގެންދާނެ ކަމަށެވެ.
ބ. އަތޮޅުގެ ރައްޔިތުންނަށް މި ޚިދުމަތް ލިބޭގޮތް ވުމުން، އެބޭފުޅުންގެ ވަގުތާއި ޚަރަދު ސަލާމަތްވެގެންދާނެ. އަދި ހަމައެހެންމެ، ޚިދުމަތް އަވަސްވެ، އިތުރަށް ހަރުދަނާވެގެންދާނެކަމަށް ޑީއެންއާރުގެ ޑިރެކްޓަރ ޖެނެރަލް އަލްފާޟިލް އަޙްމަދު ނިޔާޒް ވިދާޅުވިއެވެ.
ސަރުކާރުގެ މި އިސްނެގުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ 100 ދުވަހުގެ ވަޢުދުތަކުގެ ތެރޭގައި ހިމެނޭ ކަމެއްކަން ފާހަގަކޮށްލެވެއެވެ. 2025 ވަނަ އަހަރު ނިމުމުގެ ކުރިން ރާއްޖޭގެ ހުރިހާ ރަށަކުން އައިޑީކާޑު ހެދުމުގެ ޚިދުމަތް ލިބޭނެ ގޮތް ހެދުމަކީ ސަރުކާރުގެ އަމާޒެއްކަމަށް ޑީއެންއާރުން ބުނެފައިވެއެވެ.
މީގެއިތުރުން، ދިވެހިން ގިނައިން ދިރިއުޅޭ ބޭރު ޤައުމުތަކުގައިވެސް މި ޚިދުމަތް ފެށުމަށް ސަރުކާރުން ދަނީ މަސައްކަތް ކުރަމުންނެވެ. މި ގޮތުން ސްރީލަންކާ، އިންޑިއާ އަދި އިނގިރޭސިވިލާތުގައި ވެސް މި ޚިދުމަތް ފެށުމުގެ އިންތިޒާމްތައް ކުރިއަށްދާކަމަށް މިނިސްޓްރީ އޮފް ހޯމް އެފެއާޒްގެ ސްޓޭޓް މިނިސްޓަރ އަލްފާޟިލާ ފާތިމަތު ނަޒްހާ ވިދާޅުވިއެވެ.
އައިޑީކާޑު ޕްރިންޓްކޮށް ދޫކުރުމުގެ ޚިދުމަތް ރާއްޖޭގެ އަތޮޅުތަކުގައި ޤާއިމުކުރަން ފަށާފައިވަނީ 2024 ވަނަ އަހަރުގެ ނޮވެންބަރު މަހުއެވެ. އެންމެ ފުރަތަމަ މި ޚިދުމަތް ޤާއިމްކޮށްފައިވަނީ ގއ. ވިލިނގިލީގައެވެ. މިހާރު ރާއްޖޭގެ 7 އަތޮޅެއްގައި މި ޚިދުމަތް ޤާއިމްކުރެވިފައިވާއިރު، އަހަރު ނިމުމުގެ ކުރިން އިތުރު 13 އަތޮޅުގައި މި ޚިދުމަތް ޤާއިމްކުރެވޭނެކަމަށް ޑީއެންއާރުން ދަނީ ބުނަމުންނެވެ.
ކޮމެންޓު ފޮނުވާ