މޯލްޑިވްސް ޑިވެލޮޕްމަންޓް ބޭންކް (އެމްޑީބީ) ގެ ކުރީގެ ސީއީއޯ ނޮއެލް ގްރެގާ ޕެޓަސަން ޖޯންސް، މުސާރައާއި އެހެނިހެން އިނާޔަތްތައް ނުލިބިގެން ވަޒީފާއާ ބެހޭ ޓްރައިބިއުނަލަށް މައްސަލަ ހުށަހަޅާފައިވެއެވެ.
ޓްރައިބިއުނަލްގެ ވެބްސައިޓުގައި ޝާއިޢުކޮށްފައިވާ މަޢުލޫމާތުގެ ދަށުން، ނޮއެލް މި މައްސަލަ ހުށަހަޅާފައިވަނީ 2025 ވަނަ އަހަރުގެ އޭޕްރީލް 7 ވަނަ ދުވަހުއެވެ. ކުރިން އޭނާ އެމްޑީބީގެ ސީއީއޯގެ މަޤާމުން އިސްތިޢުފާ ދީފައިވަނީ މާރިޗު 23 ވަނަ ދުވަހުއެވެ.
ނޮއެލްގެ މައްސަލަ ހުށަހެޅުމުގެ މައިގަނޑު ސަބަބަކީ މުސާރައާއި އިނާޔަތްތައް ނުލިބުން ކަމަށް ވީނަމަވެސް، މި ކަމާ ގުޅޭ އިތުރު ތަފްޞީލެއް ހާމަކޮށްފައެއް ނުވެއެވެ.
ނަމަވެސް، ޓްރައިބިއުނަލުން މި މަހުގެ 7 ވަނަ ދުވަހު ނޮއެލްގެ މައްސަލަ ބާޠިލުކޮށްފައިވެއެވެ. މައްސަލަ ބާޠިލުކުރި ސަބަބެއްކަމަށް ޓްރައިބިއުނަލްގެ ނިންމުމުގައި ބަޔާންކޮށްފައިވަނީ، މައްސަލަ ހުށަހެޅި ފަރާތަކީ ދިވެހިބަސް ނޭނގޭ ބިދޭސީއަކަށް ވުމާއެކު، ތަރުޖަމާނަކު ހޯދުމަށް ދެވުނު ފުރުޞަތުގައި އެކަން ހަމަޖައްސައިފައި ނުވާތީއެވެ.
އެމްޑީބީގެ މަސައްކަތް ދެމެހެއްޓެނިވި ގޮތެއްގައި ފެށިފައި ނުވަނީސް ނޮއެލް އިސްތިޢުފާ ދިން ސަބަބެއް ސަރުކާރުން މިހާތަނަށް ހާމަކޮށްފައެއް ނުވެއެވެ. 2024 ވަނަ އަހަރުގެ ނޮވެމްބަރުގައި އެ ބޭންކު ރަސްމީކޮށް ލޯންޗްކުރި ނަމަވެސް، މިހާތަނަށް އަމަލީ މަސައްކަތްތަކެއް ކުރިއަށް ގެންގޮސްފައެއް ނުވެއެވެ.
ނޮއެލްގެ ފަންނީ އަދި މަސައްކަތުގެ ތަޖުރިބާގެ ތެރޭގައި ސައުދީ އަރަބިއްޔާގެ ނެޝަނަލް އިންފްރާސްޓްރަކްޗަރ ފަންޑްގެ ޗީފް އިންވެސްޓްމަންޓް އޮފިސަރުގެ މަޤާމާއި، އިނގިރޭސިވިލާތުގެ ޔޫކޭ ގްރީން އިންވެސްޓްމަންޓް ބޭންކުގެ މެނޭޖިންގ ޑިރެކްޓަރުގެ މަޤާމު (2013-2016) ހިމެނެއެވެ.
އޮކްސްފޯޑް ޔުނިވަރސިޓީން މާލީ ދާއިރާއިން މަތީ ތަޢުލީމު ޙާޞިލުކޮށްފައިވާ ނޮއެލް، 2004 އިން 2013 އަށް ސްޓާލިންގ ވޯޓަފޯޑް ސެކިއުރިޓީޒްގެ ސީއީއޯގެ މަޤާމުވެސް ފުރުއްވާފައިވެއެވެ.
ކޮމެންޓު ފޮނުވާ